Toshkent, O’zbekiston (UzDaily.uz) — O‘zbekiston va Germaniya kompaniyalari o‘zbekistonlik haydovchilarning Germaniya transport-logistika sohasida ishga joylashishini soddalashtirish choralarini muhokama qilmoqda. Takliflar orasida O‘zbekistonning milliy haydovchilik guvohnomalarini tan olish va avtobus hamda yuk avtomobillari haydovchilarini tayyorlash uchun qo‘shma avtomobil maktabini tashkil etish masalalari bor.
Ushbu masalalarni O‘zbekiston Migratsiya agentligi rahbari o‘rinbosari Elyor Toshtemirov Germaniyaning Global Talent Alliance va TSK Logistik kompaniyalari vakillari bilan muhokama qildi.
Uchrashuv yakunlari bo‘yicha Migratsiya agentligi va Global Talent Alliance hamkorlik to‘g‘risidagi kelishuvni imzoladi. Ustuvor tashabbuslar qatorida O‘zbekiston haydovchilik guvohnomalarini bevosita tan olish imkoniyatini Germaniyaning vakolatli organlari bilan kelishish ham belgilangan.
Tomonlar Germaniya va O‘zbekiston hamkorligida avtomobil maktabini tashkil etish masalasini ham ko‘rib chiqdilar. Ushbu maktab Germaniyadagi ish beruvchilar talablari va mamlakat standartlarini hisobga olgan holda avtobus hamda yuk avtomobillari haydovchilarini tayyorlashi ko‘zda tutilmoqda.
Uchrashuv ishtirokchilari viza rasmiylashtirish jarayonida nomzodlar duch kelayotgan qiyinchiliklarga ham alohida eʼtibor qaratdilar.
Migratsiya agentligi qo‘shma avtomobil maktabini tashkil etish tashabbusini qo‘llab-quvvatlashga va uni amalga oshirishga ko‘maklashishga tayyorligini bildirdi. Shu bilan birga, O‘zbekiston haydovchilik guvohnomalarini Germaniyada tan olish hozircha vakolatli organlar bilan kelishishni talab qiladigan tashabbus sifatida belgilangan.
