Toshkent, O’zbekiston (UzDaily.uz) — Andijon xalqaro aeroporti ilk bor Challenge Air Cargo aviakompaniyasining Belgiyaning Lyej shahriga kelgan Boeing 777-300 rusumli yuk samolyotini qabul qildi. Samolyot bortida O‘zbekistonga umumiy og‘irligi 82,5 tonnani tashkil etuvchi 150 bosh nasldor yirik shoxli qoramol olib kelindi.
Samolyot 21 sentyabr kuni soat 06:05 da mahalliy vaqt bilan Andijon aeroportiga qo‘ndi. Aeroport mutaxassislari tegishli xizmatlar bilan hamkorlikda hayvonlarni tushirish, veterinariya nazoratidan o‘tkazish hamda keyinchalik ularni maxsus transport vositalarida tashish ishlarini tashkil etdi.
Barcha jarayonlar belgilangan veterinariya va biologik xavfsizlik talablariga rioya qilingan holda amalga oshirildi.
Boeing 777-300 so‘nggi ikki oy ichida Andijon aeroporti qabul qilgan yangi turdagi yirik yuk samolyotlarining ikkinchisi bo‘ldi. 4 avgust kuni bu yerga ilk bor shu aviakompaniyaga tegishli Boeing 747-400F samolyoti qo‘ngan edi.
O‘shanda Lyej shahridagi aeroportdan O‘zbekistonga umumiy og‘irligi 83,3 tonnani tashkil etuvchi 160 bosh nasldor yirik shoxli qoramol olib kelingan. Shu tariqa, qisqa vaqt ichida aeroport tirik hayvonlarni tashuvchi keng fyuzelyajli yuk samolyotlarining bir nechta turiga xizmat ko‘rsatishni o‘zlashtirdi.
Yil yakuniga qadar mahalliy tadbirkor O‘zbekistonga qariyb 1 ming bosh nasldor yirik shoxli qoramol olib kelishni rejalashtirmoqda. Keyingi tashuvlarni amalga oshirish uchun Air Atlanta va Challenge Air Cargo aviakompaniyalaridan foydalanish rejalashtirilgan.
Zamonaviy keng fyuzelyajli havo kemalarini qabul qilish imkoniyati Andijon aeroporti aerodrom majmuasida keng ko‘lamli rekonstruksiya ishlari amalga oshirilib, ular 2025 yil mart oyida yakunlanganidan so‘ng paydo bo‘ldi.
Rekonstruksiya doirasida uchish-qo‘nish yo‘lagi, rulej yo‘laklari, perron hamda havo kemalarining to‘xtash joylari to‘liq yangilandi.
