Afg‘oniston delegatsiyasi O‘zbekiston avto bozorini o‘rganmoqda
Toshkent, O’zbekiston (UzDaily.uz) — Avtomobillar savdosi sohasida faoliyat yurituvchi 30 nafardan ortiq afg‘onistonlik tadbirkorlardan iborat delegatsiya O‘zbekistonning avtomobil sanoati va avtomobil bozori bilan tanishishni davom ettirmoqda. Tashrif O‘zbekiston Savdo-sanoat palatasi tashabbusi bilan tashkil etilgan bo‘lib, ikki mamlakat o‘rtasidagi savdo-iqtisodiy hamkorlikni kengaytirishga qaratilgan.
Dastur doirasida afg‘onistonlik tadbirkorlar “Sergeli” ikkilamchi avtomobil bozori va Tashkent Index savdo majmuasiga tashrif buyurdi. Ular Afg‘oniston bozorida talab yuqori bo‘lgan avtomobillar bilan tanishib, ularning narxi va texnik holatini o‘rgandi. Shuningdek, O‘zbekiston avtomobillarini yetkazib berishni tashkil etish masalalari bo‘yicha sotuvchilar, dilerlar va eksportchilar bilan muzokaralar o‘tkazildi.
Dasturning yana bir bandi avtomobil bamperlari va tashqi plastik butlovchi qismlar ishlab chiqarishga ixtisoslashgan Baner Print korxonasiga tashrifdan iborat bo‘ldi. Delegatsiyaga ishlab chiqarishning to‘liq sikli, texnologik jarayonlar, foydalanilayotgan uskunalar va kompaniyaning eksport imkoniyatlari taqdim etildi. Tomonlar avtomobil butlovchi qismlarini Afg‘onistonga yetkazib berish istiqbollari, distribyutorlik tarmog‘ini rivojlantirish va savdo hamkorligini kengaytirish masalalarini muhokama qildi.
Bundan tashqari, afg‘onistonlik tadbirkorlar Global Petrochemical Group va Technology of Real Time korxonalariga tashrif buyurdi. Global Petrochemical Group zavodida mehmonlar antifrizlar, motor va transmissiya moylari, shuningdek, avtomobillar uchun boshqa texnik suyuqliklar ishlab chiqarish jarayoni, sifat nazorati tizimi va korxonaning eksport salohiyati bilan tanishdi.
Technology of Real Time qo‘shma korxonasida delegatsiyaga avtomobil ehtiyot qismlarini ishlab chiqarishning zamonaviy texnologiyalari, lokalizatsiya darajasi va ishlab chiqarilayotgan mahsulotlar assortimenti taqdim etildi.
Uchrashuvlar davomida tomonlar avtomobil ehtiyot qismlari, texnik suyuqliklar va moylash materiallarini Afg‘oniston bozoriga eksport qilish istiqbollari, to‘g‘ridan-to‘g‘ri ishbilarmonlik aloqalarini rivojlantirish va uzoq muddatli hamkorlik masalalarini ham muhokama qildi.
Tashkilotchilarning fikricha, tashrif O‘zbekiston va Afg‘oniston tadbirkorlari o‘rtasida sanoat kooperatsiyasini mustahkamlash, eksport hajmini oshirish hamda O‘zbekiston avtomobil sanoati mahsulotlarining Afg‘oniston bozoridagi ishtirokini kengaytirishga xizmat qiladi.
