Xalq banki va Mastercard AI-kreditlashni joriy qiladi

Toshkent, O‘zbekiston (UzDaily.uz) — O‘zbekiston Xalq banki va xalqaro to‘lov kompaniyasi Mastercard strategik hamkorlik to‘g‘risidagi kelishuvni imzoladi. Hujjat yangi avlod bank kartalarini ishga tushirish va sunʼiy intellekt asosidagi kredit skoringi tizimini joriy etishni nazarda tutadi.

Hujjat 59-yillik Osiyo taraqqiyot banki Boshqaruvchilar kengashi yig‘ilishi doirasida imzolandi.

Tomonlar kelishuv O‘zbekiston moliya bozorini rivojlantirish va bank sohasiga zamonaviy texnologik yechimlarni joriy etishga qaratilganini maʼlum qildi.

Asosiy loyihalardan biri Xalq Card yangi karta mahsulotini chiqarish bo‘ladi. Xalq bankida taʼkidlanishicha, karta mijozlarga individual yondashuvga yo‘naltiriladi. Mahsulotni ishlab chiqishda xalqaro tajriba, mahalliy bozor xususiyatlari va foydalanuvchilarning kundalik ehtiyojlarini hisobga olish rejalashtirilgan.

Bankda loyihaning maqsadi faqat to‘lov vositasini emas, balki mijozlarning kundalik hayotiga integratsiya qilingan to‘liq moliyaviy servisni yaratish ekani qayd etildi.

Hamkorlikning ikkinchi yo‘nalishi sunʼiy intellektdan foydalangan holda kreditlash tizimini joriy etishdan iborat bo‘ladi. Texnologiya arizalarni qayta ishlashni avtomatlashtirish va qaror qabul qilishda inson omili taʼsirini minimallashtirish imkonini beradi.

Kutilishicha, yangi tizim maʼlumotlar asosida arizalarni bir necha soniya ichida tahlil qila oladi. Bu kreditlarni ko‘rib chiqish tezligini oshirish va qarz oluvchilarni aniqroq baholash orqali xavflarni kamaytirishga xizmat qiladi. Xalq bankida AI-texnologiyalardan foydalanish moliyaviy xizmatlarni aholi uchun yana-da ochiq va qulay qilishini taʼkidlashdi.

Kelishuv shuningdek, Mastercard xalqaro moliyaviy texnologiyalarini Xalq banki servislariga integratsiya qilishni ham nazarda tutadi. Tomonlar fikricha, bu mijozlarga xizmat ko‘rsatish qulayligi va tezkorligini oshiradi.