“Uzbekistan Airways“ I chorakda foydasini uch baravar oshirdi

Toshkent, O‘zbekiston (UzDaily.uz) — “Uzbekistan Airways“ AJning 2026 yil I chorak yakunlariga ko‘ra sof foydasi 151,8 mlrd so‘mni tashkil etdi, bu o‘tgan yilning shu davriga nisbatan 3 baravar yuqoridir (+206,1%).

Shu bilan birga, sof tushum deyarli o‘zgarishsiz qoldi — 3,9 trln so‘m. Foyda o‘sishining asosiy omili ko‘rsatilgan xizmatlar tannarxining kamayishi bo‘ldi, u 3,7 trlndan 3,3 trln so‘mga tushdi, natijada yalpi foyda 171,2 mlrddan 608,6 mlrd so‘mga oshdi.

Uzoq muddatli bank kreditlari hajmi 6,8 trlndan 8,0 trln so‘mga oshdi. Qisqa muddatli kreditlar esa davr yakuniga kelib 82,2 mlrd so‘mni tashkil etdi.

Ta’kidlash joizki, O‘zbekiston Milliy investitsiya jamg‘armasi (“UzNIF“) aviakompaniyaning 25% aksiyalariga egalik qiladi. Jamg‘arma portfeli bahosiga ko‘ra, “Uzbekistan Airways“ $1,6 mlrd miqdorida baholanmoqda, jamg‘arma ulushi (25% aksiyalar) esa $403,6 mlnni tashkil etadi.