Toshkentda pora ishi bo‘yicha soliq inspektorlari ushlandi

Toshkent, O‘zbekiston (UzDaily.uz) — Toshkent shahrida Yunusobod tumani soliq xizmatida faoliyat yuritgan ikki nafar xodimga nisbatan tadbirkordan pul mablag‘i talab qilganlik gumoni bilan jinoyat ishi qo‘zg‘atildi.

Davlat xavfsizlik xizmati maʼlumotiga ko‘ra, tezkor tadbirlar poytaxt bo‘yicha DXX boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda o‘tkazilgan. Tekshiruv uchun asos DXX koll-markaziga kelib tushgan murojaat bo‘lgan.

Idora maʼlumotlariga ko‘ra, soliq inspektorlari o‘zaro til biriktirib, tadbirkordan 5 ming AQSH dollari talab qilgan.

Ushbu mablag‘ evaziga ular tadbirkorning «Chilonzor buyum bozori kompleksi» kompaniyasiga tegishli uchta savdo joyini ijaraga berish bo‘yicha ochiq tenderda g‘olib bo‘lishini taʼminlashni, shuningdek, zarur shartnomalarni rasmiylashtirishda yordam berishni vaʼda qilgan.

Soliq xizmati xodimlari pul mablag‘larini olish vaqtida ushlangan.

Hozirda mazkur holat yuzasidan jinoyat ishi qo‘zg‘atilgan va tergov harakatlari olib borilmoqda.

Huquqni muhofaza qiluvchi organlar ishning qo‘shimcha tafsilotlarini ochiqlamagan.