O‘zbekiston kimyo olimpiadasida to‘rtta medalni qo‘lga kiritdi

Toshkent, O’zbekiston (UzDaily.uz) — O‘zbekiston terma jamoasi 58-xalqaro kimyo olimpiadasida (IChO 2026) muvaffaqiyatli ishtirok etib, bitta oltin va uchta kumush medalni qo‘lga kiritdi. Mamlakatning barcha to‘rt nafar vakili xalqaro musobaqa sovrindorlari qatoridan o‘rin oldi. Bu haqda O‘zbekiston Maktabgacha va maktab taʼlimi vazirligi xabar qildi.

Oltin medal Rayhona To‘ymurodovaga nasib etdi. Jasur Mustafoyev, Azizmuhammad Hafizov va Mirjalol Homidjonov esa kumush medal sohiblari bo‘ldi.

O‘zbekiston Prezidentining 2024 yil 30 sentyabrdagi qaroriga muvofiq, nufuzli xalqaro olimpiadalar g‘oliblari davlat pul mukofotlari bilan taqdirlanadi. Oltin medal uchun 1 milliard 30 million so‘m miqdorida mukofot belgilangan. G‘olibni tayyorlagan o‘qituvchiga esa 185,4 million so‘m to‘lanadi.

Kumush medal sohiblarining har biri 618 million so‘mdan, ularni tayyorlagan o‘qituvchilar esa 103 million so‘mdan mukofot puli oladi. Bronza medal uchun 412 million so‘m, o‘qituvchisi uchun esa 61,8 million so‘m miqdorida mukofot nazarda tutilgan.

Bundan tashqari, mazkur hujjat xalqaro olimpiada g‘oliblarini tayyorlagan pedagoglarning malaka toifasini bir pog‘onaga oshirishni ham nazarda tutadi.