TBC Uzbekistan: 2026-yilning 1-choragida 93 milliard so'm foyda

Toshkent, O‘zbekiston (UzDaily.uz) — Markaziy Osiyodagi yetakchi raqamli bank ekotizimi — TBC Uzbekistan bugun 2026-yil 31-martda yakunlangan uch oy uchun MHXS bo‘yicha jamlangan moliyaviy natijalarini e’lon qiladi.

Birinchi chorak yakunlariga ko‘ra, TBC Bank (mamlakatdagi eng yirik raqamli banklardan biri), payme (to‘lov ilovasi), TBC BNPL (xaridlar uchun jadal rivojlanayotgan muddatli to‘lov xizmati), TBC Sug‘urta (dinamik rivojlanayotgan raqamli sug‘urta xizmati) va BILLZ (O‘zbekistonda chakana savdoni boshqarish uchun yetakchi SaaS-platformasi)ni birlashtirgan ekotizim chakana takliflarni yanada diversifikatsiya qilish va biznes uchun mahsulotlar ko‘lamini kengaytirish hisobiga barcha asosiy ko‘rsatkichlar bo‘yicha yuqori natijalarni namoyish etdi.

2026-yilning 1-choragida ro‘yxatdan o‘tgan foydalanuvchilarning umumiy soni 24,2 mlnga yetdi, bu o‘tgan yilning shu davriga (19,7 mln) nisbatan 23 foizga ko‘pdir. Oylik faol auditoriya (MAU) 5,8 mln foydalanuvchini tashkil etdi.

To‘lovlar hajmi yillik hisobda 31,1 foizga o‘sib, 31,8 trln so‘mga yetdi. Depozit portfeli o‘tgan yilning shu davriga nisbatan 24,3 foizga ko‘payib, 7,1 trln so‘mni, kredit portfeli esa 3,4 foizga o‘sib, 10,4 trln so‘mni tashkil etdi.

Ushbu asosiy ko‘rsatkichlarning barqaror o‘sishi tufayli 2026-yilning 1-choragidagi umumiy operatsion daromad 700 mlrd so‘mni, sof foyda esa 93 mlrd so‘mni tashkil qildi. 

TBC Uzbekistan chakana mijozlar uchun yetakchi raqamli bank sifatidagi o‘z mavqeini mustahkamlashda davom etmoqda va ayni paytda biznes uchun takliflarni kengaytirib, o‘sib borayotgan KO‘B segmentini moliyaviy hamda qo‘shimcha xizmatlar bilan qamrab olmoqda.

Ekotizimning flagman debet kartasi va kundalik bank operatsiyalari uchun asosiy mahsulot bo‘lgan TBC Salom kartasi o‘z auditoriyasini faol ravishda kengaytirmoqda. 2026-yilning 1-choragida chiqarilgan kartalar soni 1 milliondan oshdi — bu bir yil avvalgi 230 mingtaga nisbatan besh baravar ko‘pdir. TBC Salom kartalaridagi qoldiqlar umumiy depozit portfelining 4 foizini tashkil qiladi.

TBC Osmon kredit kartasiga ham talab yuqori: chiqarilgan kartalar soni 2026-yilning 1-choragiga kelib 183 mingtaga yetdi. TBC Uzbekistan O‘zbekistonning shakllanayotgan kredit kartalari bozoridagi yetakchi ishtirokchilardan biriga aylanib ulgurdi va mijozlarning yangi mahsulotga moslashishi bilan ushbu bozor jadal o‘sishi kutilmoqda. Hozirgi vaqtda TBC Osmon kartalaridagi qoldiqlar umumiy kredit portfelining 9 foizini tashkil etadi.

TBC Bank va payme ilovalarida mavjud bo‘lgan obuna asosidagi paket takliflari auditoriyasi bir yilda 7 barobar o‘sib, 1,1 million foydalanuvchiga yetdi. Obuna mijozlarga noyob xizmatlar to‘plamidan foydalanish imkonini beradi.

Xaridlar uchun muddatli to‘lov xizmati TBC BNPL xizmatiga bo‘lgan talab o‘sishda davom etdi: 2026-yilning 1-choragida faol foydalanuvchilar soni 190 mingga yetdi. Ekotizim doirasida muddatli to‘lov xizmatlarini kengaytirish doirasida “Keyinroq to‘lash” funksiyasi payme ilovasida va payme travel bo‘limida ham joriy etildi. Shu sababli 2026-yilning 1-choragida payme travel’dagi bronlar va chiptalar savdosi hajmi o‘tgan yilning shu davriga nisbatan ikki baravarga oshdi.

Shuningdek, 2026-yilning 1-choragida shu yil ishga tushirilishi kutilayotgan avtokreditlash xizmatiga tayyorgarlik ishlari olib borildi. Mahsulotning asosiy xususiyatlari orasida – bir zumda (bir daqiqadan kamroq vaqt ichida) tasdiqlash, bitimni to‘liq qo‘llab-quvvatlash va dilerlar uchun maxsus interfeys mavjud. Xizmatni ishga tushirish arafasida TBC Uzbekistan yetakchi avtomobil ishlab chiqaruvchilar, dilerlar va distribyutorlar bilan hamkorlik shartnomalarini imzoladi.

TBC Biznes yo‘nalishi jismoniy shaxslar va biznes uchun mahsulotlarni birlashtiruvchi mintaqadagi yetakchi ekotizimni yaratish strategiyamiz doirasida barqaror o‘sish ko‘rsatishda davom etdi.

2026-yil 31-mart holatiga ko‘ra ekotizimda 67 mingta biznes-mijoz ro‘yxatdan o‘tgan bo‘lib, ularning 21 mingtasi faoldir. Kichik va o‘rta biznes subyektlariga (shu jumladan o‘zini o‘zi band qilganlarga) ajratilgan kreditlarning umumiy soni 185 mingdan oshdi, bu jami kredit portfelining 18 foiziga teng. Biznes yo‘nalishini kuchaytirish maqsadida yangi TBC Biznes ilovasi ishga tushirildi, yangi ko‘p bosqichli obuna xizmati joriy etildi, kreditning maksimal miqdori esa 600 million so‘mgacha oshirildi.

Chakana savdoni avtomatlashtirish bo‘yicha yetakchi SaaS-platforma — BILLZ jadal o‘sishda davom etdi. 2026-yilning 1-choragida umumiy qiymati 5,8 trln so‘mga teng 11 mlndan ortiq tranzaksiya amalga oshirildi. 2026-yil 31-mart holatiga ko‘ra platformadan 4 mingdan ortiq ro‘yxatdan o‘tgan biznes-mijozlar va 6 mingta faol savdo shoxobchasi foydalangan. 

Xizmatdan foydalanishni yanada osonlashtirish hamda mikro, kichik va o‘rta korxonalar segmentidagi ulushimizni faolroq oshirishga yordam berish uchun asosiy BILLZ platformasiga qo‘shimcha ravishda uning soddalashtirilgan mobil versiyasi — BILLZ lite ilovasi ishga tushirildi.

2026-yilning 1-choragida TBC Uzbekistan ekotizimi mintaqada, ayniqsa, sun’iy intellekt sohasida texnologik yetakchilikni saqlab qolishda davom etdi. 2025-yil oxirida “Friends&Family” rejimida o‘tkazilgan muvaffaqiyatli sinovlardan so‘ng, biz raqamli bankingni interaktivlik va personallashtirishning yangi bosqichiga olib chiqadigan sun’iy intellekt yordamchisi — Lola’ni barcha mijozlar uchun to‘liq joriy etishni boshladik. 2026-yil aprel oyida Lola sun’iy intellekt yordamchisi Osiyo-Tinch okeani mintaqasidagi eng yaxshi fintex-innovatsiya sifatida Global Finance mukofotiga sazovor bo‘ldi.

Shuningdek, TBC Bank ilovasiga QR-kod (MSQR va CSQR) orqali to‘lov qilish imkoniyatini qo‘shib, ekotizimning turli qismlari integratsiyasini yaxshiladik. Shu tariqa payme tarmog‘i hisobidan bankning savdo nuqtalaridagi qamrovini kengaytirdik. Bundan tashqari, payme xizmati TBC Bank hamkorlik tarmog‘iga integratsiya qilindi va bu TBC Bank ilovasi foydalanuvchilariga 20 mingdan ortiq savdo shoxobchasidan foydalanish imkonini berdi.

Nika Kurdiani, CEO TBC Uzbekistan:“O‘tgan chorak muhim yutuqlar bilan yodda qoldi. Bu yutuqlar ekotizimimizning iste’molchilar va tadbirkorlar uchun mintaqadagi yetakchi yagona platforma sifatidagi keyingi o‘sishi va rivojlanish bosqichiga zamin yaratadi.

Bizning ilg‘or chakana mahsulotlarimizga talab yuqoriligicha qolmoqda va biz mijozlarga foyda keltiradigan hamda ularning hayotini osonlashtiradigan yangi xizmatlarni muntazam ravishda ishga tushirib boryapmiz. Ekotizimga kirishning asosiy nuqtalari bo‘lgan TBC Salom va TBC Osmon kartalari tez ommalashib, yangi mijozlarni jalb qilmoqda va ularning mahsulotlarimizdan yanada faol foydalanishiga yordam bermoqda.

Shu bilan birga, biz biznes yo‘nalishini faol rivojlantirmoqdamiz va allaqachon sezilarli natijalarni ko‘ryapmiz. BILLZ platformasi tadbirkorlarga kundalik vazifalar uchun zarur vositalarni taqdim etib, muhim bog‘lovchi bo‘g‘in vazifasini bajarishda davom etmoqda. TBC Bank esa, o‘z navbatida, biznesni rivojlantirish uchun zarur bo‘lgan moliyalashtirishdan foydalanish imkonini beradi. Ushbu sinergiya tufayli TBC Biznes kreditlari hajmi umumiy kredit portfelining 18 foizigacha o‘sdi.

Bu chorakda biz sun’iy intellekt texnologiyalari sohasida muhim marraga erishdik — barcha mijozlar uchun Lola nomli sun’iy intellekt yordamchisini keng ko‘lamda joriy etishni boshladik. Bu — sun’iy intellekt sohasidagi flagman mahsulotimiz bo‘lib, raqamli bank xizmatlarini interaktivlik va personallashtirishning yangi darajasiga olib chiqadi. Dastlabki bosqichda sun’iy intellekt yordamchisi mijozlarning odatiy so‘rovlarini qayta ishlash bilan shug‘ullanadi, vaqt o‘tib esa biznes-mijozlarni ko‘p millionli chakana auditoriya bilan bog‘lab, ekotizimimizning ikki qismini birlashtiruvchi to‘laqonli shaxsiy yordamchiga aylanadi”.