Toshkent, O’zbekiston (UzDaily.uz) — Visa kompaniyasi (NYSE: V) Salima Gutiyevaning Markaziy Osiyo bo‘yicha vitse-prezident va mintaqaviy menejer lavozimiga tayinlanganini e’lon qildi. Salima 2026-yil 1-dekabrda rasman o‘z lavozimiga kirishadi.
Yangi lavozimida u mintaqada raqamli to‘lovlarni rivojlantiradi, yangi texnologik yechimlarni ilgari suradi, banklar va savdo korxonalari bilan hamkorlikni chuqurlashtiradi va karta egalari uchun ko‘proq imkoniyatlar yaratadi. Bu lavozimda u Sanjar Sulaymonovning o‘rnini egallaydi.
Salima Gutiyeva Visa kompaniyasida 20 yildan ortiq vaqt davomida Markaziy va Sharqiy Yevropa, Yaqin Sharq va Afrika (CEMEA) bozorlarida biznesni rivojlantirish va sotish bo‘yicha yetakchi lavozimlarda ishlagan. 2022-yildan buyon u Birlashgan Arab Amirliklaridagi Visa biznesini vitse-prezident va mintaqaviy menejer sifatida boshqarib, bozorni rivojlantirish, qulay va xavfsiz raqamli to‘lovlarga ortib borayotgan talabni qondirishda mijozlar va davlat hamkorlarini qo‘llab-quvvatlash uchun mas’ul bo‘lgan.
"Biz Salimani yangi lavozimda kutib olishdan mamnunmiz va uning ko‘p yillik tajribasi hamda bozor ehtiyojlarini chuqur tushunishi Visa kompaniyasiga mintaqadagi hamkorlarimiz va mijozlarimiz uchun yanada ko‘proq qiymat yaratishda yordam berishiga ishonamiz. Biz Sanjar Sulaymonovga Markaziy Osiyo mamlakatlari raqamli iqtisodiyotini rivojlantirishga qo‘shgan hissasi va mintaqada naqd pulsiz to‘lovlar mavqeini mustahkamlashga imkon bergan loyihalari uchun minnatdorchilik bildiramiz. Markaziy Osiyo Visa uchun strategik jihatdan muhim va eng jadal rivojlanayotgan mintaqalardan biri bo‘lib qolmoqda: bizning ustuvor yo‘nalishlarimiz, sarmoyalarimiz va mijozlarimiz oldidagi majburiyatlarimiz o‘zgarishsiz qolmoqda," - deb izoh berdi Ukraina, Moldova, Janubi-Sharqiy Yevropa, Markaziy Osiyo va Kavkazdagi Visa katta vitse-prezidenti va mintaqaviy menejeri Sergey Martinchuk.
"Raqamli to‘lovlar va moliya sektorining rivojlanish dinamikasi va sur’atlari bilan hayratlanarli bo‘lgan Markaziy Osiyoda Visa jamoasiga rahbarlik qilish men uchun katta sharaf. Markaziy Osiyo bugungi kunda to‘lov texnologiyalarini rivojlantirish uchun eng qiziqarli bozorlardan biri hisoblanadi. Jamoa va hamkorlar bilan birgalikda biz innovatsiyalarni joriy etishni, to‘lov infratuzilmasini rivojlantirishni va to‘lovlarni tezroq, qulayroq va xavfsizroq qiladigan yechimlarni yaratishni davom ettiramiz," - dedi Visa kompaniyasining Markaziy Osiyodagi vitse-prezidenti va mintaqaviy menejeri Salima Gutiyeva.
