Soliq qo‘mitasi banklar bilan maʼlumot almashish loyihasini izohladi

Toshkent, O’zbekiston (UzDaily.uz) — O‘zbekiston Soliq qo‘mitasi banklar tomonidan soliq organlariga maʼlumot taqdim etish tartibiga oid qaror loyihasi atrofida yuzaga kelgan jamoatchilik muhokamalari munosabati bilan rasmiy bayonot berdi.

Idora taʼkidlashicha, ayrim ommaviy axborot vositalarida eʼlon qilingan materiallarda hujjatning mazmuni noto‘g‘ri talqin qilinib, u asosan jismoniy shaxslarning depozitlariga qarshi qaratilgan chora sifatida ko‘rsatilgan.

Soliq qo‘mitasi maʼlum qilishicha, loyihaning asosiy maqsadi boshqacha bo‘lib, u amaldagi qonunchilik doirasida banklar va soliq organlari o‘rtasida axborot almashinuvining yagona qoidalarini belgilashga qaratilgan. Xususan, soliq nazorati uchun zarur bo‘lgan maʼlumotlarni taqdim etish tartibi, muddatlari, shakllari va elektron formatini aniqlash nazarda tutilgan.

Idora alohida taʼkidladiki, mazkur hujjat soliq organlariga yangi vakolatlar bermaydi, bank siri institutini bekor qilmaydi hamda fuqarolar yoki tadbirkorlarning hisobvaraqlariga erkin kirish imkoniyatini yaratmaydi. Banklar maʼlumotlarni soliq organlariga faqat qonunda nazarda tutilgan holatlar va tartib asosida taqdim etishi mumkin.

Soliq organlarining tegishli vakolatlari Soliq kodeksining 134-moddasida mustahkamlangan. Shuningdek, «Bank siri to‘g‘risida»gi qonun muhofaza qilinadigan maʼlumotlarni soliq xizmati organlariga faqat muayyan mijozning soliqqa tortilishi bilan bog‘liq masalalar bo‘yicha va qonunchilikda belgilangan tartibda oshkor etishga ruxsat beradi.

Soliq qo‘mitasi soliq organlariga kelib tushadigan maʼlumotlar soliq siri hisoblanishini ham eslatdi. Bunday maʼlumotlarni oshkor qilish, uchinchi shaxslarga berish yoki belgilangan maqsaddan tashqari foydalanish qonun bilan taqiqlangan.

Idoraning qayd etishicha, shunga o‘xshash axborot almashinuv mexanizmlari xalqaro amaliyotda, jumladan Iqtisodiy hamkorlik va taraqqiyot tashkiloti mamlakatlarida keng qo‘llaniladi hamda jahon standartlariga mos keladi. O‘zbekiston soliq maqsadlari uchun shaffoflik va axborot almashinuvi bo‘yicha Global forumga qo‘shilgan bo‘lib, bu mazkur sohada aniq va mustahkamlangan qoidalar mavjud bo‘lishini talab qiladi.

Qaror loyihasi jamoatchilik muhokamasi uchun joylashtirilgan. Soliq qo‘mitasi fuqarolar, tadbirkorlar, ekspertlar hamjamiyati va ommaviy axborot vositalari vakillarini muhokamada konstruktiv ishtirok etishga chaqirdi. Shuningdek, hujjatni takomillashtirish jarayonida kelib tushgan barcha taklif va mulohazalar inobatga olinishi maʼlum qilindi.