Shavkat Mirziyoyev 9 May paradi uchun Moskvaga bormaydi

Toshkent, O‘zbekiston (UzDaily.uz) — O‘zbekiston Prezidenti Shavkat Mirziyoyev Moskvada 9 May munosabati bilan o‘tkaziladigan tadbirlarda ishtirok etmaydi. Rossiya poytaxtiga tashrif o‘rniga u 8 may kuni G‘alaba bog‘iga borib, Matonat madhiyasi monumenti poyiga gul qo‘ydi.

O‘zbekiston prezidenti matbuot xizmati maʼlum qilishicha, Shavkat Mirziyoyev Ikkinchi jahon urushi qatnashchilari va mehnat fronti faxriylari bilan ham uchrashuv o‘tkazadi. Tadbirlar mamlakatda nishonlanadigan Xotira va qadrlash kuni doirasida bo‘lib o‘tadi.

Kreml tomonidan eʼlon qilingan Moskvaga kelayotgan xorijiy delegatsiyalar ro‘yxatida Markaziy Osiyo davlatlari rahbarlari ko‘rsatilmagan. Kutilayotgan ishtirokchilar orasida Abxaziya, Janubiy Osetiya va Belarus prezidentlari, shuningdek Laos, Malayziya, Slovakiya va Serb Respublikasi vakillari tilga olingan.

Rossiya manbalari maʼlumotlariga ko‘ra, bu 2018 yildan buyon Markaziy Osiyo davlatlari rahbarlari ishtirokisiz o‘tadigan ilk 9 May paradi bo‘ladi.

Rossiya prezidenti yordamchisi Yuriy Ushakov: «Biz o‘tgan yilgidek bayramga xorijiy mehmonlarni maxsus taklif qilmadik», — deb aytganini RIA Novosti xabar qildi.

Bu yil Qizil maydondagi parad uzoq vaqtdan beri birinchi marta harbiy texnikasiz o‘tkaziladi. Rossiya Mudofaa vazirligi buni operativ vaziyat bilan izohladi. Rossiya prezidenti matbuot kotibi Dmitriy Peskov esa qarorni terrorchilik tahdidi bilan bog‘ladi.