Toshkent, O’zbekiston (UzDaily.uz) — Toshkentda bo‘lib o‘tgan Milliy yoshlar yadro muloqoti ishtirokchilari atom tarmog‘ining bo‘lajak mutaxassislarini amaliy tayyorlash imkoniyatlarini kengaytirishni taklif qildi. Ilgari surilgan tashabbuslar orasida qisqa muddatli stajirovkalarni tashkil etish, turli oliy taʼlim muassasalari talabalariga AES o‘quv trenajyorlaridan foydalanish imkonini berish va atom texnologiyalari haqida yagona axborot resursini yaratish bor.
Muloqot Impact Team 2050 xalqaro tashabbusi doirasida bo‘lib o‘tdi. Unda talabalar, yosh olimlar, tarmoq tashkilotlari, tegishli idoralar, oliy taʼlim muassasalari va yoshlar birlashmalari vakillari ishtirok etdi. Tarmoq rahbarlari bilan ochiq suhbatdan so‘ng ishtirokchilar muhokamani guruhlarda davom ettirdi. Guruhlarda taʼlim, kasbiy o‘sish, kasbga yo‘naltirish, hududiy infratuzilma va jamiyatning atom energetikasiga munosabati masalalari muhokama qilindi.
Muhokamaning asosiy mavzularidan biri o‘qish davridayoq amaliy tajriba orttirish imkoniyati bo‘ldi.
– Ishtirokchilar ikki-to‘rt haftalik qisqa muddatli stajirovkalarni taklif qildi. Bunday format talabalarga nazariy bilimlarini amaliyotda mustahkamlash va sohaga ixtisoslashgan tashkilotlar faoliyati bilan yaqindan tanishish imkonini beradi. Yoshlar bunday tajribani xorijda, bevosita atom elektr stansiyalarida ham orttirishni istaydi. Bunday istaklarni bakalavriatni tugatishimdan oldin ham eshitganman, hozir ham eshityapman. Menimcha, bu yoshlarning kasbiy rivojlanishga va amaliy tajriba orttirishga qiziqishini ko‘rsatadi, – dedi Impact Team 2050 Xalqaro yoshlar maslahat kengashi aʼzosi Muxiddin Umidov.
Shu maqsadda boshqa muhandislik oliy taʼlim muassasalari talabalariga “MMFI” Milliy tadqiqot yadro universitetining Toshkent filialidagi o‘quv trenajyorlaridan foydalanish imkonini berish ham taklif qilindi.
Hududlardagi yoshlar uchun atom tarmog‘idagi kasblar haqida maʼlumot olish imkoniyati alohida muhokama qilindi. Umidovning so‘zlariga ko‘ra, ishtirokchilar tarmoq bilan yaqindan tanishish va amaliy tajriba orttirish masalalarini ko‘targan. Kasbga yo‘naltirishga misol sifatida u Jizzaxda maktab o‘quvchilari va yoshlar bilan o‘tkazilgan uchrashuvlarni keltirib, bunday ishlarni kengaytirish zarurligini taʼkidladi.
Ishtirokchilar yoshlarning atom tarmog‘idagi kasblar haqida xabardorligini oshirish masalasiga ham to‘xtaldi. Takliflar orasida tarmoq yangiliklari va texnik maʼlumotlarni jamlaydigan yagona axborot resursini yaratish hamda murakkab mavzularni yana-da tushunarli tarzda izohlash uchun ijtimoiy tarmoqlardan foydalanish g‘oyalariga alohida eʼtibor berildi.
Uchrashuvning ochiq qismida “O‘zatom” agentligi direktori Azim Ahmedxo‘jayev mamlakatda rivojlanayotgan atom energetikasi uchun kadrlar tayyorlash zarurligiga to‘xtaldi.
– Bugun O‘zbekiston atom energetikasi rivojlanishning muhim bosqichida. Biz mamlakat uchun mutlaqo yangi, yuqori texnologiyali tarmoqni shakllantirmoqdamiz: keng ko‘lamli infratuzilma loyihalarini amalga oshirmoqdamiz, xalqaro hamkorlikni kengaytirmoqdamiz va ayni paytda kadrlar tayyorlash milliy tizimini barpo etmoqdamiz. Ammo har qanday texnologiya ortida odamlar turadi, – dedi Azim Ahmedxo‘jayev.
Yoshlarning takliflari guruhlarda ishlash chog‘ida va onlayn so‘rov orqali to‘plandi. Ayni paytda tashkilotchilar muloqot materiallari hamda ishtirokchilarning takliflarini umumlashtirmoqda.
– Ixtiyorimizda onlayn so‘rov anketalari va ishchi guruhlarning taqdimotlari bor. Asosiy takliflarni ajratib olish uchun to‘plangan maʼlumotlarni diqqat bilan o‘rganmoqdamiz. Biz uchun yoshlarning fikrlarini inobatga olish va ular ko‘rsatgan to‘siqlarni aniqlash muhim. Ushbu ish natijalari asosida yoshlarning kasbiy imkoniyatlarini kengaytirish hamda ularning atom energetikasi haqida xabardorligini oshirish bo‘yicha tavsiyalar tayyorlashni rejalashtirmoqdamiz, – dedi Muxiddin Umidov.
Impact Team 2050ning umumiy yo‘l xaritasini tayyorlashda o‘zbekistonlik ishtirokchilarning takliflarini ham inobatga olish rejalashtirilgan. Hujjatda turli mamlakatlarda o‘tkazilgan yoshlar yadro muloqotlari natijalari hamda atom tarmog‘idagi kasblarni tanlashda uchraydigan to‘siqlarni bartaraf etish bo‘yicha tavsiyalarni jamlash ko‘zda tutilgan. Hujjatni 9–20 noyabr kunlari Turkiyaning Antaliya shahrida bo‘lib o‘tadigan BMTning iqlim o‘zgarishi bo‘yicha COP31 konferensiyasi doirasidagi uchrashuvda “Rosatom” bosh direktori Aleksey Lixachyovga taqdim etish rejalashtirilgan.
