Toshkent, O’zbekiston (UzDaily.uz) — O‘zbekiston Prezidenti Administratsiyasi rahbari Saida Mirziyoyeva Toshkent shahrida yashil hududlar sonini ko‘paytirish zarurligini taʼkidladi.
Uning qayd etishicha, issiq iqlim sharoitida daraxtlar, suv havzalari va soyali hududlar aholi hayot sifatiga bevosita taʼsir qiladi.
Mirziyoyeva Toshkentning Shayxontohur tumanida barpo etilishi rejalashtirilayotgan bo‘lajak bog‘ hududini ko‘zdan kechirdi. Bu yerda ko‘l va yashil hududlar barpo etish, shuningdek, sayr qilish, sport bilan shug‘ullanish, oilaviy dam olish va bolalar bilan hordiq chiqarish uchun joylar tashkil etish rejalashtirilmoqda.
Mirziyoyevaning so‘zlariga ko‘ra, bunday hududlarni poytaxtning barcha tumanlarida tashkil etish zarur. U, shuningdek, bog‘lar sonini ko‘paytirish, mavjud yashil hududlarni saqlash va yangi ekologik toza massivlarni barpo etish muhimligini taʼkidladi.
Uning taʼkidlashicha, yashil infratuzilmani rivojlantirish Toshkent taraqqiyotining muhim yo‘nalishlaridan biri hisoblanadi.
