Quyosh energiyasi subsidiyalari 73,9 mlrd so‘mdan oshdi

Toshkent, O‘zbekiston (UzDaily.uz) — 2026 yil birinchi choragida O‘zbekistonda 45,2 ming nafar jismoniy shaxs quyosh panellari orqali ishlab chiqarilgan va tarmoqqa uzatilgan elektr energiyasi uchun davlat byudjetidan subsidiya oldi. Jami to‘lovlar hajmi 73 mlrd 982 mln so‘mni tashkil etdi.

Eng katta subsidiya hajmi Buxoro viloyati hissasiga to‘g‘ri kelib, u yerda to‘lovlar 16,5 mlrd so‘mni tashkil qildi. Xorazm viloyatida bu ko‘rsatkich 13,3 mlrd so‘mga, Qashqadaryo viloyatida esa 9,1 mlrd so‘mga yetdi.

Subsidiyalar 2023 yil 1 apreldan amal qilayotgan «Quyoshli xonadon» dasturi doirasida taqdim etilmoqda. Uning shartlariga ko‘ra, jismoniy shaxslar tomonidan o‘rnatilgan quyosh panellarida ishlab chiqarilib, o‘z ehtiyojidan ortiq qismi yagona energetika tizimiga uzatilgan har bir kilovatt-soat elektr energiyasi uchun davlat byudjetidan 1000 so‘mdan to‘lanadi.

Olingan mablag‘larni Soliq mobil ilovasi orqali bank kartasiga o‘tkazish mumkin. Buning uchun «Keshbek va imtiyozlar» bo‘limidagi «Quyoshli xonadon» xizmatida mablag‘ni kartaga o‘tkazish imkoniyati mavjud.

Subsidiyalash mexanizmi qayta tiklanuvchi energiya manbalaridan foydalanishni rag‘batlantirish va aholining elektr energiyasi ishlab chiqarishdagi ishtirokini kengaytirishga qaratilgan.