Toshkent, O’zbekiston (UzDaily.uz) — Qoraqalpoq davlat universitetida 17 sentyabr kuni Xitoy Xalq Respublikasining Syuychjou sanoat va texnologiyalar kolleji hamda XCMG kompaniyasi vakillari bilan uchrashuv bo‘lib o‘tdi. Bu haqda Berdah nomidagi Qoraqalpoq davlat universiteti xabar berdi.
Uchrashuv davomida universitet rektori B. Jollibekov va Xitoy delegatsiyasi aʼzolari taʼlim, ilm-fan va ishlab chiqarish sohalarida hamkorlikni rivojlantirish masalalarini muhokama qildi. Tomonlar zamonaviy texnologiyalar asosida amaliy ko‘nikmalarga ega yuqori malakali mutaxassislar tayyorlash bo‘yicha fikr almashdilar.
Muzokaralar yakunlari bo‘yicha Berdah nomidagi Qoraqalpoq davlat universiteti, Syuychjou sanoat va texnologiyalar kolleji hamda XCMG kompaniyasi o‘rtasida uch tomonlama hamkorlik memorandumi imzolandi.
Hujjat hamkorlikning bir qator muhim yo‘nalishlarini qamrab oladi. Ular orasida zamonaviy xalqaro talablarga muvofiq qurilish mashinasozligi sohasida mutaxassislar tayyorlash, taʼlim dasturlari va o‘quv-uslubiy resurslarni birgalikda ishlab chiqish, professor-o‘qituvchilar va texnik mutaxassislar almashinuvini tashkil etish, shuningdek, talabalarning amaliy tayyorgarlik tizimini takomillashtirish kabi yo‘nalishlar bor.
Hamkorlikning muhim yo‘nalishlaridan biri dual taʼlim tizimini joriy etish bo‘ladi. Ushbu model orqali talabalar universitetda nafaqat nazariy bilim olish, balki XCMG kompaniyasining ishlab chiqarish va servis korxonalarida bevosita amaliy tayyorgarlikdan o‘tish imkoniyatiga ega bo‘ladi. Bunda ishlab chiqarish amaliyotini tashkil etish, zamonaviy texnika va texnologiyalar bilan ishlash ko‘nikmalarini shakllantirish, shuningdek, mehnat bozori talablariga mos kasbiy kompetensiyalarni rivojlantirishga alohida eʼtibor qaratiladi.
Bundan tashqari, tomonlar Qoraqalpoq davlat universitetining qurilish fakultetida XCMGning Qurilish mashinasozligi xorijiy texnologiyalar instituti O‘zbekiston filialini tashkil etish bo‘yicha qo‘shma loyihani amalga oshirish masalasini muhokama qildi.
Loyiha doirasida zamonaviy taʼlim dasturlarini joriy etish, ilg‘or xalqaro tajribani o‘quv jarayoniga integratsiya qilish va ishlab chiqarish sohasi bilan uzviy bog‘liq mutaxassislar tayyorlash imkoniyatlarini kengaytirish rejalashtirilmoqda.
Uchrashuv yakunlari bo‘yicha tomonlar taʼlim va ishlab chiqarish integratsiyasini mustahkamlash, dual taʼlimning samarali mexanizmlarini bosqichma-bosqich joriy etish hamda qo‘shma taʼlim loyihalarini amalga oshirishga kelishib oldilar.
Mazkur hamkorlik talabalarning nazariy tayyorgarligini amaliy tajriba bilan uyg‘unlashtirish, xalqaro tajribani taʼlim jarayoniga joriy etish va zamonaviy muhandislik yo‘nalishlari uchun malakali kadrlar tayyorlash imkoniyatlarini kengaytirishga xizmat qiladi.
