Toshkent, O’zbekiston (UzDaily.uz) — Qashqadaryo viloyatida to‘rt yoshli qizchaning o‘limi yuzasidan qo‘zg‘atilgan jinoyat ishi o‘limga olib kelgan qasddan sog‘liqqa zarar yetkazish to‘g‘risidagi moddadan qasddan odam o‘ldirish to‘g‘risidagi moddaga qayta malakalandi. Bu haqda Bolalar ombudsmani maʼlum qildi.
Vedomstvo maʼlumotlariga ko‘ra, 26 sentyabr kuni 32 yoshli ayol va uning turmush o‘rtog‘i o‘rtasida janjal yuzaga kelgan. Nizo vaqtida qizchaning o‘gay onasi bo‘lgan ayol o‘gay qizini urgan. Bola og‘ir bosh jarohati olgan va ko‘p o‘tmay vafot etgan.
Ertasi kuni tuman ichki ishlar bo‘limi Jinoyat kodeksining 126-moddasi bo‘yicha — jabrlanuvchining o‘limiga olib kelgan qasddan sog‘liqqa zarar yetkazish fakti yuzasidan jinoyat ishi qo‘zg‘atgan. Gumonlanuvchi ushlangan.
30 sentyabr kuni jinoyat ishi Qashqadaryo viloyati prokuraturasiga topshirilgan. Shundan so‘ng gumonlanuvchining harakatlari Jinoyat kodeksining 97-moddasi — «Qasddan odam o‘ldirish» bo‘yicha qayta malakalangan.
Hozirgi vaqtda dastlabki tergov harakatlari Qashqadaryo viloyati prokuraturasi tomonidan olib borilmoqda.
Bolalar ombudsmani tergov jarayonini kuzatib borishi va uning natijalari haqida jamoatchilikni xabardor qilib borishini maʼlum qildi.
