Toshkent, O’zbekiston (UzDaily.uz) — 18 sentyabr kuni Toshkent ko‘chalari orqali 1 274 527 ta transport vositasi harakatlangan. Shu kuni poytaxtda beshta yo‘l-transport hodisasi qayd etilib, ularda sakkiz kishi jarohatlangan. O‘lim bilan bog‘liq holatlar qayd etilmagan. Bu haqda Toshkent shahar Yo‘l harakatini tashkil etish markazi xabar berdi.
Tirbandlik yuqori bo‘lgan soatlarda eng katta transport oqimi 07:00 dan 08:00 gacha qayd etilgan — bu vaqtda 310 434 ta avtomobil harakatlangan. 18:00 dan 19:00 gacha esa poytaxt ko‘chalari orqali 270 621 ta transport vositasi o‘tgan.
18 sentyabr kuni 1 669 ta avtobus 170 ta yo‘nalish bo‘yicha 21 860 ta reysni amalga oshirib, 1 490 346 nafar yo‘lovchini tashidi. Toshkent metropolitenidan 1 145 326 nafar yo‘lovchi foydalandi. Eng katta yo‘lovchi oqimi “Chilonzor”, «Buyuk ipak yo‘li», “Beruniy”, “Chinor” va “Olmazor” bekatlarida qayd etildi.
Vaziyat markazi maʼlumotlariga ko‘ra, 08:00 dan 09:00 gacha to‘qqizta chorrahada tirbandlik darajasi 7 ballni tashkil etgan. Ular qatoriga Sariqo‘l — Mehrjon, M. Ulug‘bek — T. Malik, G‘. Aliyev — Lokomotiv, Farg‘ona yo‘li — Nukus, Bobur — Nukus, Cho‘pon-ota — Sh. Rustaveli, Toshkent halqa avtomobil yo‘li — Sagbon, Nurafshon — Beruniy va Bunyodkor — Qoratosh ko‘chalari kesishmalari kiradi.
Transport oqimini yuklama yuqori bo‘lgan uchastkalarda barqarorlashtirish maqsadida svetoforlarning ishlash rejimlari tartibga solinib, ayrim yo‘nalishlarda yashil chiroq yonib turish vaqti uzaytirildi. Ayrim chorrahalarda harakatni YHXB xodimlari tartibga soldi.
18 sentyabr kuni qator ko‘chalarda kommunal va taʼmirlash ishlari olib borildi. Ular transport harakatiga qisman taʼsir ko‘rsatdi. Ishlarni shahar xizmatlari, Hududgaztaminot, Toshkent Shahar Elektr Tarmoqlari, Toshkent Shahar Suv Ta‘minoti, Hududiy Elektr Tarmoqlari va Veolia Energy Tashkent tashkilotlari amalga oshirdi.
18 sentyabr kuni YHXB xodimlari avtomobil vositalarining piyodalar yo‘laklari bo‘ylab harakatlangani bilan bog‘liq 14 ta holatni, to‘xtab turish qoidalarining 31 ta buzilishini va to‘xtash qoidalarining 60 ta buzilishini rasmiylashtirdi. Bundan tashqari, piyodalarning yo‘lning belgilanmagan joylaridan kesib o‘tishi bilan bog‘liq 893 ta qoidabuzarlik qayd etildi.
Yo‘l infratuzilmasini yangilash doirasida bir kun davomida qariyb 4 000 metr yo‘l chizig‘i va ikkita piyodalar yo‘lakchasi yangilandi.
Yo‘l harakatini tashkil etish markazi haydovchilarni yo‘nalishlarni rejalashtirishda transport yuklamasini hisobga olish, to‘xtash va to‘xtab turish qoidalariga rioya qilish, piyodalar o‘tish joylarida ularga yo‘l berish, avtobus bekatlari hududini egallamaslik va jamoat transporti harakatiga xalaqit bermaslikka chaqirdi.
