Toshkent, O’zbekiston (UzDaily.uz) — Pokistonning metallurgiya kompaniyasi Pak Steel O‘zbekistonda armatura va boshqa po‘lat mahsulotlarini ishlab chiqarish bo‘yicha investitsiya loyihasini amalga oshirish imkoniyatini ko‘rib chiqmoqda. Bu haqda Dunyo axborot agentligi xabar berdi.
Qo‘shma loyihani amalga oshirish istiqbollari O‘zbekistonning Islomoboddagi elchisi Alisher To‘xtayev va Pak Steel direktori Hassan Farid o‘rtasida muhokama qilindi.
Hassan Faridning so‘zlariga ko‘ra, Pokistonda elektr energiyasi narxining yuqoriligi ishlab chiqarish tannarxi va mahsulotlarning raqobatbardoshligiga salbiy taʼsir ko‘rsatmoqda.
Shu munosabat bilan kompaniya energetika resurslari nisbatan qulayroq bo‘lgan O‘zbekistonni yangi ishlab chiqarish korxonasini tashkil etish uchun maydon sifatida ko‘rib chiqmoqda.
Pak Steel tomonidan inobatga olinayotgan boshqa omillar qatorida sanoat zonalarida infratuzilmaning mavjudligi, shuningdek, investorlarga taqdim etiladigan imtiyoz va preferensiyalar qayd etildi.
Kompaniya, shuningdek, uy-joylar, mehmonxonalar, dambalar va transport infratuzilmasi obyektlarini qurish loyihalarida ishtirok etishga tayyorligini bildirdi.
Uchrashuv yakunlari bo‘yicha tomonlar O‘zbekistonning tegishli davlat organlari bilan videokonferensiyalar tashkil etish va keyingi hamkorlik bo‘yicha «yo‘l xaritasi»ni ishlab chiqishga kelishib oldi. Keyinchalik Pak Steel rahbariyatining O‘zbekistonga tashrifi kutilmoqda.
Pak Steel, shuningdek, Pakistan Steel Mills nomi bilan ham tanilgan bo‘lib, 1949 yilda tashkil etilgan. Kompaniya armatura, oddiy va deformatsiyalangan po‘lat sterjenlar, shvellerlar va boshqa metall konstruksiyalar jumladan, turli xil po‘lat mahsulotlarini ishlab chiqaradi.
Uning mahsulotlaridan Pokistonda yo‘l inshootlari, metro, turar joy va maʼmuriy binolar, sanoat obyektlari hamda boshqa inshootlarni qurishda foydalaniladi.
