O‘zbekistonda valyutaga talab besh oyda 20 foizga oshdi

Toshkent, O’zbekiston (UzDaily.uz) — 2026 yilning yanvar–may oylarida O‘zbekistonda yuridik va jismoniy shaxslarning chet el valyutasiga bo‘lgan jami talabi 25,7 milliard dollarni tashkil etdi. Bu o‘tgan yilning shu davriga nisbatan 20,1 foizga ko‘pdir. 2025 yilning yanvar–may oylarida mazkur ko‘rsatkich 21,4 milliard dollarga teng bo‘lgan. Bu haqda respublika Markaziy banki maʼlum qildi.

Talabning asosiy qismi yuridik shaxslar hissasiga to‘g‘ri keldi. Ular tomonidan 20,2 milliard dollarlik chet el valyutasi sotib olingan. Jismoniy shaxslar esa 5,5 milliard dollar miqdorida valyuta xarid qilgan.

Chet el valyutasi taklifi ham sezilarli darajada oshdi. Yuridik va jismoniy shaxslar tomonidan amalga oshirilgan valyuta sotuvlarining umumiy hajmi qariyb 5 milliard dollarga yoki 28,6 foizga ko‘payib, 22,3 milliard dollarga yetdi. Bunda aholi tijorat banklariga 10,2 milliard dollarlik valyuta sotgan bo‘lsa, yuridik shaxslar tomonidan sotilgan valyuta hajmi 12,1 milliard dollarni tashkil qildi.

Valyuta bozoridagi aylanmalar o‘sishiga qaramay, milliy valyuta kursi nisbatan barqarorligini saqlab qoldi. Hisobot davrida dollar kursi 11 938 so‘mdan 12 320 so‘mgacha bo‘lgan oraliqda tebranib, umumiy hisobda yil boshidagi darajada saqlanib qoldi.

Ayirboshlash kursi volatilligining o‘rtacha ko‘rsatkichi 30 so‘m yoki 0,25 foizni tashkil etdi. Taqqoslash uchun, 2025 yilning yanvar–may oylarida mazkur ko‘rsatkich 17,3 so‘m yoki 0,13 foiz bo‘lgan.