O‘zbekistonda biznesni kreditlash 20%ga oshdi

Toshkent, O‘zbekiston (UzDaily.uz) — 2026 yil yanvar–mart oylarida O‘zbekistonda mikro, kichik va o‘rta biznes subyektlarini kreditlash hajmi o‘tgan yilning shu davriga nisbatan 20,2%ga oshib, 35,1 trln so‘mga yetdi. Bu haqda respublika Markaziy banki maʼlumotlarida qayd etilgan.

Joriy yilning birinchi choragida umumiy hisobda mamlakat iqtisodiyotiga barcha moliyalashtirish manbalari hisobidan 89,9 trln so‘m kredit mablag‘lari yo‘naltirildi, bu 2025 yilning shu davriga nisbatan 9,1%ga ko‘pdir.

Tadbirkorlikni qo‘llab-quvvatlashga qaratilgan davlat dasturlari doirasida ajratilgan kreditlar hajmi 7 992 mlrd so‘mni tashkil etib, yillik hisobda 11%ga oshdi. Mablag‘larning katta qismi “Mahalla” loyihasiga to‘g‘ri kelib, uning doirasida 4 260 mlrd so‘m ajratildi, bu o‘tgan yilga nisbatan 36%ga ko‘pdir.

Kichik biznesni uzluksiz qo‘llab-quvvatlash dasturi bo‘yicha 1 331 mlrd so‘m kredit ajratildi, bu o‘tgan yilning shu davriga nisbatan 12%ga yuqori. Ushbu mablag‘lar amalda faoliyat yuritayotgan korxonalarni rivojlantirish va kengaytirishga yo‘naltirilgan.

Oilaviy tadbirkorlik dasturi doirasida 1 253 mlrd so‘m, «Biznesga birinchi qadam» tashabbusi bo‘yicha esa, yangi tadbirkorlarga 1 149 mlrd so‘m kreditlar ajratildi.

Keltirilgan ko‘rsatkichlar tadbirkorlarning moliyaviy resurslarga bo‘lgan imkoniyatlari kengayib borayotganini va davlat tomonidan biznesni qo‘llab-quvvatlash ko‘lami ortib borayotganini, jumladan, mahalla mexanizmlari hamda oilaviy va kichik biznesni rivojlantirish dasturlari orqali amalga oshirilayotganini aks ettiradi.