Toshkent, O’zbekiston (UzDaily.uz) — O‘zbekiston Respublikasi Vazirlar Mahkamasi huzuridagi Migratsiya agentligi matbuot xizmati
O‘zbekiston va Yaponiyaning Yamagata prefekturasi yapon ish beruvchilarining ehtiyojlarini hisobga olgan holda o‘zbekistonlik mutaxassislarni tayyorlash va ishga joylashtirish sohasidagi hamkorlikni rivojlantirish niyatida.
Migratsiya agentligi direktori Muxsinxo‘ja Abdurahmonovning Yamagata delegatsiyasi bilan muzokaralari Xalqaro tillar va kasblarga o‘qitish markazi — INTILda bo‘lib o‘tdi. Bu haqda O‘zbekiston Migratsiya agentligi xabar berdi.
Yaponiya delegatsiyasi tarkibidan prefektura hukumati, Yamagata universiteti va O‘zbekistondan ishchi kuchini jalb etishdan manfaatdor kompaniyalar vakillari o‘rin oldi. Tomonlar hududdagi kadrlar yetishmovchiligini bartaraf etish usullari va bo‘lajak xodimlarni kasbiy tayyorlashni tashkil etish masalalarini muhokama qildi.
Yaponiya vakillari Yamagatada ishchi kuchi yetishmayotganini taʼkidlab, mahalliy korxonalarda ishlashga va hududda uzoq muddat davomida yashashga moslasha oladigan xorijiy mutaxassislarni jalb etishdan manfaatdor ekanliklarini bildirdilar.
Migratsiya agentligi bevosita O‘zbekistonda maqsadli kadrlar tayyorlash modelini taqdim etdi. Taklif etilayotgan mexanizmga muvofiq, yapon ish beruvchilari nomzodlarning malakasi, yapon tilini bilish darajasi va o‘quv dasturlari mazmuniga qo‘yiladigan talablarni belgilaydi. O‘zbekiston tomoni esa nomzodlarni tanlash, ularni kasbiy va til bo‘yicha o‘qitish, amaliy mashg‘ulotlar o‘tkazish hamda xorijga ko‘chib borishga tayyorlashni tashkil etishga tayyor.
INTIL markazining imkoniyatlari o‘quv xonalari, amaliy mashg‘ulotlar o‘tkazish maydonlari, suhbatlar va kasbiy test sinovlarini tashkil etish uchun zarur sharoitlarni o‘z ichiga oladi. Markazda, shuningdek, taxminan 400 o‘rinli yotoqxona mavjud.
Migratsiya agentligi O‘zbekiston fuqarolarini keyinchalik ishga joylashtirishni nazarda tutuvchi qo‘shma tayyorgarlik dasturlarini amalga oshirish uchun markaz infratuzilmasini xorijiy hamkorlarga bepul taqdim etishga tayyorligini bildirdi.
Muzokaralarning alohida yo‘nalishi Yaponiyada ishlash uchun professional haydovchilarni tayyorlash bo‘ldi. O‘zbekiston tomoni Toshkent viloyatida ixtisoslashtirilgan maydon tashkil etilganini maʼlum qildi. Unda rul o‘ng tomonda joylashgan yuk avtomobillaridan foydalanish va Yaponiyadagi yo‘l sharoitlarini modellashtirish rejalashtirilgan. Bu nomzodlarning ko‘nikmalarini baholash va ular xorijga ketishidan oldin amaliy mashg‘ulotlar o‘tkazish imkonini beradi.
Tomonlar axborot texnologiyalari hamda muhandislik-texnika sohalaridagi hamkorlik istiqbollarini ham ko‘rib chiqdi.
Yaponiyaning MSI kompaniyasi vakili xorijiy IT-mutaxassislarni jalb etish tajribasi haqida so‘zlab, O‘zbekiston bilan hamkorlik qilishdan manfaatdor ekanini bildirdi. Kompaniya vakillariga IT Park Uzbekistan imkoniyatlarini, jumladan, Zero Risk mexanizmini o‘rganish taklif etildi. Ushbu mexanizm mamlakatda faoliyat boshlayotgan xorijiy IT-kompaniyalarga infratuzilmaviy va boshqa turdagi ko‘mak ko‘rsatishni nazarda tutadi.
O‘z navbatida, Abe Engineering kompaniyasi muhandislik va texnik kadrlarni jalb etishga qiziqish bildirdi. Dastlabki bosqichda O‘zbekistonning bir yoki ikki nafar fuqarosini ishga joylashtirish yoki stajirovkaga qabul qilish imkoniyati ko‘rib chiqilmoqda.
Bundan tashqari, uchrashuv ishtirokchilari texnika oliy taʼlim muassasalari talabalari uchun yapon tili bo‘yicha ixtisoslashtirilgan kurslarni tashkil etish va ish beruvchilarning talablarini hisobga olgan holda o‘quv guruhlarini shakllantirish masalalarini muhokama qildi.
Bo‘lajak ishga joylashtirish shartlarini oldindan kelishib olishga alohida eʼtibor qaratildi. Ular qatoriga ish haqi, taʼlim olish davomiyligi, til bilish darajasiga qo‘yiladigan talablar va kasbiy rivojlanish imkoniyatlari kiradi.
Hamkorlikni yana-da rivojlantirish maqsadida Muxsinxo‘ja Abdurahmonov 2027 yil fevral–mart oylarida Yamagata prefekturasida mahalliy ish beruvchilar ishtirokida O‘zbekistonning kadrlar salohiyati taqdimotini o‘tkazishni taklif qildi.
Shuningdek, prefektura rahbariyatining O‘zbekistonga tashrifini tashkil etish imkoniyati ham muhokama qilindi. Tashrifdan maqsad kasbiy taʼlim tizimi, texnika universitetlari va Migratsiya agentligi infratuzilmasi bilan tanishishdan iborat.
Muzokaralar yakunida tomonlar Yamagata korxonalarining kadrlarga bo‘lgan ehtiyojlari haqida maʼlumot almashish, ustuvor kasblar va nomzodlarga qo‘yiladigan talablarni belgilash, shuningdek, til va kasbiy tayyorgarlik bo‘yicha qo‘shma dasturlarni ishlab chiqishga kelishib oldi.
Kutilishicha, hamkorlik O‘zbekiston fuqarolarining Yaponiyada qonuniy mehnat faoliyati bilan shug‘ullanish imkoniyatlarini kengaytirishga hamda yapon ish beruvchilarining talablariga muvofiq mutaxassislar tayyorlashni yo‘lga qo‘yishga xizmat qiladi.
