Toshkent, O’zbekiston (UzDaily.uz) — O‘zbekiston elektr energiyasi ishlab chiqarish uchun yoqilg‘idan foydalanish bilangina cheklanib qolmasdan, yuqori qo‘shilgan qiymatga ega mahsulotlar ishlab chiqarish maqsadida tabiiy gazni chuqur qayta ishlashni kengaytirishni rejalashtirmoqda. Bu haqda Prezident Shavkat Mirziyoyev 16 oktyabr kuni yoqilg‘i-energetika sohasi investorlari bilan ochiq muloqotda maʼlum qildi.
Davlat rahbari gazdan olinadigan elektr energiyasi hajmi bilangina emas, balki uni qayta ishlash orqali yaratiladigan qo‘shimcha iqtisodiy qiymat bilan ham hisoblashish muhimligini taʼkidladi.
Mirziyoyev amaldagi ishlab chiqarish namunasi sifatida Qashqadaryo viloyatidagi sintetik suyuq yoqilg‘i ishlab chiqarish majmuasini keltirdi. Korxona har yili 1,5 million tonnagacha yoqilg‘i va boshqa mahsulotlar ishlab chiqaradi.
Buxoro viloyatida metanoldan olefinlar olishga qaratilgan MTO loyihasini amalga oshirish rejalashtirilgan. Ushbu loyiha doirasida polietilen, polipropilen va polietilentereftalat (PET) ishlab chiqarish ko‘zda tutilgan. Bundan tashqari, Buxoro va Farg‘ona neftni qayta ishlash zavodlarini modernizatsiya qilish rejalashtirilmoqda.
Mirziyoyev hukumat investorlardan zamonaviy texnologiyalarga asoslangan, ekologik talablarga javob beradigan va iqtisodiy jihatdan asoslangan takliflarni kutayotganini bildirdi. Loyihalarni tanlashda raqobat, shaffoflik, iqtisodiy samaradorlik va o‘zaro manfaat asosiy mezonlar bo‘ladi.
Shu bilan birga, O‘zbekiston geologik qidiruv ishlari va konlarni o‘zlashtirish samaradorligini oshirish bo‘yicha xalqaro hamkorlikni kengaytirmoqda. Ustyurtda Ozarbayjonning SOCAR va Buyuk Britaniyaning BP kompaniyalari bilan hamkorlikda oltita investitsiya blokida qidiruv-geologiya ishlari olib borilmoqda.
Xorijiy hamkorlarni jalb qilish uchun yana 128 ta blok tayyorlangan. Ularning prognoz resurslari 5,8 trillion kub metr gaz va 560 million tonna suyuq uglevodorodga baholanmoqda.
