Toshkent, O’zbekiston (UzDaily.uz) — O‘zbekistonning oziq-ovqat, to‘qimachilik va elektrotexnika sohalaridagi korxonalari Fransiya va Polshada o‘tkazilgan biznes-missiyalar hamda Road Show doirasida Yevropa bozorlariga eksportni kengaytirish bo‘yicha kelishuvlarga erishdi. Bu haqda Investitsiyalar, sanoat va savdo vazirligi xabar berdi.
Tadbirlar 21–26 sentyabr kunlari bo‘lib o‘tdi. Fransiyada O‘zbekiston delegatsiyasi Chanel kompaniyasi va Rungis savdo-logistika markaziga tashrif buyurib, hamkorlik istiqbollarini muhokama qildi.
Uchrashuvlar yakunlari bo‘yicha o‘zbekistonlik mutaxassislarni o‘qitish, mayiz eksportini tashkil etish, shuningdek, ICG kompaniyasining mis mahsulotlarini birinchi marta yetkazib berish bo‘yicha kelishuvlarga erishildi.
Polshada «Made in Uzbekistan» Road Show va B2B uchrashuvlari doirasida ishtirokchilar Yevropa bozorlarida O‘zbekiston mahsulotlarini saqlash, distributsiya qilish va ilgari surishning yangi kanallarini rivojlantirish imkoniyatlarini ko‘rib chiqdi.
Muzokaralar muzlatilgan olcha, mayiz, tayyor kiyim-kechak, shuningdek, mis va kabel mahsulotlarini eksport qilish bo‘yicha kelishuvlar bilan yakunlandi.
O‘tkazilgan biznes-missiyalar yangi ishbilarmonlik aloqalarini o‘rnatish va O‘zbekiston korxonalarining Yevropa bozorlaridagi ishtirokini kengaytirish uchun maydon bo‘ldi.
