Oʻzbekiston va Ummon investitsiyalarni kengaytirishni muhokama qilishdi

Toshkent, O‘zbekiston (UzDaily.uz) — 29-aprel kuni O‘zbekiston Respublikasi Investitsiyalar, sanoat va savdo vaziri Laziz Kudratov Ummon Sultonligining O‘zbekiston Respublikasidagi Favqulodda va Muxtor Elchisi Vafa Al Busaydiy bilan uchrashuv o‘tkazdi.

Muzokaralar chog‘ida tomonlar iqtisodiyot, investitsiya va logistika sohalarida O‘zbekiston-Ummon hamkorligining bugungi holati hamda uni yanada kengaytirish istiqbollarini muhokama qildilar.

Ikki mamlakat o‘rtasida o‘zaro manfaatli sheriklikni rivojlantirish uchun mustahkam poydevor yaratilgani, shu bilan birga, ikki tomonlama munosabatlarni chuqurlashtirishda hali foydalanilmagan ulkan salohiyat mavjudligi ta’kidlandi.

Bugungi kunda O‘zbekistonda Ummon sarmoyasi ishtirokidagi 10 ta korxona faoliyat yuritmoqda, umumiy qiymati 3,2 milliard dollarga teng bo‘lgan 20 ta yangi qo‘shma loyiha ustida ish olib borilmoqda.

Uchrashuv yakunida O‘zbekiston va Ummon o‘rtasidagi hamkorlikni yanada mustahkamlash, yangi investitsiyaviy tashabbuslarni hayotga tatbiq etish, shuningdek, joriy yilning 16-18 iyun kunlari bo‘lib o‘tadigan 5-Toshkent xalqaro investitsiya forumida xorijiy tomonning ishtirok etishi yuzasidan o‘zaro kelishuvga erishildi.