Toshkent, O’zbekiston (UzDaily.uz) — IT Park Uzbekistan Janubiy Afrika Respublikasi bilan BPO, IT va global biznes xizmatlari sohalaridagi hamkorlikni kengaytirmoqda. IT Park delegatsiyasining Yoxannesburgga tashrifi doirasida tomonlar Janubiy Afrika kompaniyalarini O‘zbekistonga jalb qilish va to‘g‘ridan-to‘g‘ri biznes aloqalarini rivojlantirish masalalarini muhokama qildi.
22 sentyabr kuni Yoxannesburgda birinchi «O‘zbekiston — Janubiy Afrika Respublikasi» biznes-forumi bo‘lib o‘tdi. Unda davlat organlari, biznes uyushmalari, shuningdek, ikki mamlakatning 60 dan ortiq kompaniya va tashkilotlari vakillari ishtirok etdi. IT va raqamli xizmatlar ikki tomonlama hamkorlikning istiqbolli yo‘nalishlaridan biri sifatida belgilandi.
Tashrif davomida IT Park vakillari Global Business Services va BPO ekotizimi ishtirokchilari, texnologik kompaniyalar hamda JAR taraqqiyot institutlari bilan qator uchrashuvlar o‘tkazdi. O‘zbekistonda yangi servis va delivery-markazlarni ochish, mahalliy jamoalarni shakllantirish hamda mutaxassislarni jalb qilish imkoniyatlari muhokama qilindi.
Asosiy hamkorlardan biri JARning GBS/BPO sohasidagi milliy tarmoq tashkiloti Business Process Enabling South Africa (BPESA) bo‘ldi. Uchrashuvda tomonlar xalqaro kompaniyalarni qo‘llab-quvvatlash, delivery-markazlarni ishga tushirish va sohani rivojlantirish mexanizmlarini ko‘rib chiqdi. Shuningdek, BPESA yondashuvlari bilan IT Park Uzbekistan‘ning Softlanding va Zero Risk dasturlari o‘rtasidagi o‘xshashliklar qayd etildi.
Tomonlar JARning GBS/BPO sektoridagi kompaniyalarining O‘zbekiston bozoriga chiqish imkoniyatlarini o‘rganish hamda Keyptaundagi BPESA jamoasi bilan hamkorlikni davom ettirishga kelishib oldi.
Hamkorlik masalalari Gauteng Growth and Development Agency (GGDA) bilan uchrashuvda ham muhokama qilindi. Uchrashuv ishtirokchilari Gauteng provinsiyasi kompaniyalari va IT Park Uzbekistan ekotizimi o‘rtasida to‘g‘ridan-to‘g‘ri aloqalar o‘rnatish, istiqbolli loyihalar haqida axborot almashish va yangi biznes aloqalarini shakllantirish masalalarini ko‘rib chiqdi. GGDA Janubiy Afrika kompaniyalari va tashkilotlari bilan keyingi hamkorlikka ko‘maklashishga tayyorligini bildirdi.
JAR Savdo, sanoat va raqobat departamenti (DTIC) bilan ham alohida muzokaralar o‘tkazildi.
Tomonlar ikki mamlakat startaplari o‘rtasidagi aloqalarni rivojlantirish, istiqbolli loyihalarni qo‘llab-quvvatlash va texnologik ekotizimlar o‘rtasidagi hamkorlikni muhokama qildi.
Xususiy sektor vakillari bilan uchrashuvlar BPO, HR-autsorsing, bulutli texnologiyalar, sunʼiy intellekt, kiberxavfsizlik, dasturiy taʼminot ishlab chiqish va raqamli transformatsiya yo‘nalishlarini qamrab oldi. Janubiy Afrika kompaniyalari O‘zbekistonning kadrlar salohiyati va mamlakatda yangi operatsiyalarni joylashtirish imkoniyatlariga qiziqish bildirdi.
GRIFFILEE PROMOTIONS, ITM Katope, AT Business Solutions, Encore Strategic Partners, 3 Worx IT va Matiwane Diplomatic Consulting kompaniyalari IT Park Uzbekistan delegatsiyasi bilan muzokaralarda ishtirok etdi.
Keyingi bosqich erishilgan aloqalarni amaliy loyihalarga aylantirish, jumladan, Janubiy Afrika biznesini O‘zbekistonga jalb qilish, delivery va back-office markazlarini tashkil etish hamda ikki mamlakatning IT va BPO ekotizimlari o‘rtasidagi aloqalarni mustahkamlashdan iborat bo‘ladi.
