Oʻzbekiston va Leapmotor elektromobillar ishlab chiqarishni muhokama qilishdi

Toshkent, O‘zbekiston (UzDaily.uz) — O'zbekiston investitsiyalar, sanoat va savdo vaziri o'rinbosari Ilzat Kasimov hamda Xitoyning "Leapmotor" kompaniyasi vitse-prezidenti Ley Min o'rtasida bo'lib o'tgan uchrashuvda elektromobillar ishlab chiqarishni birgalikda yo'lga qo'yish masalasi muhokama qilindi.

Muloqot chog'ida asosiy e'tibor mahalliylashtirish darajasini yuksaltirish hamda tayyor mahsulot tarkibidagi mahalliy butlovchi qismlar ulushini bosqichma-bosqich oshirish istiqbollariga qaratildi.

Rivojlanish strategiyasi nafaqat ichki bozorni to'ldirishni, balki xalqaro bozorlarga chiqish uchun eksport salohiyatidan samarali foydalanishni ham ko'zda tutadi.

Muzokaralar yakunida tomonlar muloqotni yanada kengaytirish va mazkur loyihani hayotga tatbiq etish maqsadida amaliy hamkorlik bosqichlariga o'tishga kelishib oldilar.