“Oʻzbekiston temir yoʻllari” va Yevropa tiklanish va taraqqiyot banki temir yoʻl sohasini raqamlashtirish boʻyicha kelishuv imzoladi

Toshkent, O’zbekiston (UzDaily.uz) — 2026 yil 17 iyun kuni V Toshkent xalqaro investisiya forumi doirasida "O‘zbekiston temir yo‘llari" AJ va Yevropa tiklanish va taraqqiyot banki (YeTTB) o‘rtasida "Transport va magistral harakatni boshqarish hamda kiberbarqarorlikni oshirish bo‘yicha axborot tizimlarini joriy etish" loyihasini amalga oshirish bo‘yicha kelishuv imzolandi.

Loyiha temir yo‘l sohasini yanada raqamli transformatsiya qilish, tashishlarni boshqarish jarayonlarini takomillashtirish va kompaniya faoliyati samaradorligini oshirishga qaratilgan. Loyihaning amalga oshirilishi temir yo‘l transportini rivojlantirish va ko‘rsatilayotgan xizmatlar sifatini oshirish uchun zamonaviy shart-sharoitlar yaratish imkonini beradi.

Loyihaning muhim tarkibiy qismi "O‘zbekiston temir yo‘llari" AJ axborot infratuzilmasining barqarorligi va ishonchliligini mustahkamlashdan iborat bo‘lib, bu kompaniyaning asosiy biznes jarayonlarining barqaror va xavfsiz ishlashini ta’minlashga xizmat qiladi.

Bitimning imzolanishi "O‘zbekiston temir yo‘llari" AJni modernizatsiya qilish dasturini amalga oshirish yo‘lidagi navbatdagi qadam bo‘lib, kompaniyaning ilg‘or texnologiyalarni joriy etish, operasion samaradorlikni oshirish va O‘zbekiston Respublikasining transport-logistika salohiyatini rivojlantirishga bo‘lgan intilishini aks ettiradi.