Kamilla Rahimova US Open musobaqasida Kreychikovani mag‘lub etdi
Toshkent, O’zbekiston (UzDaily.uz) — O‘zbekiston vakili Kamilla Rahimova AQSH Ochiq tennis chempionatining ikkinchi bosqichiga yo‘l oldi. U start uchrashuvida chexiyalik tennischi Barbora Kreychikovani 7:6, 6:2 hisobida mag‘lub etdi. Musobaqa boshlangan paytda Kreychikova WTA reytingida 27-o‘rinni, Rahimova esa 88-o‘rinni egallagan edi.
Birinchi set tennischilarning teng kurashi ostida o‘tdi va tay-breyk bilan yakunlandi. Rahimova tay-breykda 7:4 hisobida g‘alaba qozonib, uchrashuvda oldinga chiqdi.
Ikkinchi partiyada O‘zbekiston vakili ustunlikni qo‘lga kiritdi va uchrashuvni 6:2 hisobida g‘alaba bilan yakunladi. Bahs 1 soat 53 daqiqa davom etdi.
Bu Rahimovaning WTA turnirlarida Kreychikovaga qarshi o‘tkazgan ikki o‘zaro uchrashuvdagi birinchi g‘alabasi bo‘ldi. Ushbu muvaffaqiyat evaziga o‘zbek tennischisi ketma-ket uchinchi marta «Katta dubulg‘a» turnirining ikkinchi bosqichiga chiqdi.
US Open‘ning ikkinchi bosqichida Rahimova yaponiyalik Aoi Ito va Ispaniya vakili Oksana Selexmeteva o‘rtasidagi uchrashuv g‘olibiga qarshi maydonga tushadi. Ularning bahsi 31 avgust kuniga rejalashtirilgan.
31 avgust, dushanba kuni yana bir O‘zbekiston vakili Mariya Timofeyeva ham musobaqadagi ishtirokini davom ettiradi. Uning raqibi sloveniyalik Tamara Zidanshek bo‘ladi. Uchrashuv musobaqaning ikkinchi kuni taqvimiga kiritilgan.
