Hindiston klinikalari O‘zbekistonda filial ochishga qiziqmoqda
Toshkent, O’zbekiston (UzDaily.uz) — Hindistonning yirik klinikalari, jumladan Apollo, O‘zbekistonda o‘z klinikalarini ochishga qiziqish bildirdi. Bu haqda 30 avgust kuni sog‘liqni saqlash vaziri Eldor Adilov Hindiston Bosh vaziri Narendra Modining O‘zbekistonga davlat tashrifi doirasida jurnalistlarga maʼlum qildi.
Vazirning so‘zlariga ko‘ra, Hindiston bilan hamkorlik doirasida O‘zbekistonda hozirning o‘zida 10 dan ortiq loyiha amalga oshirilmoqda. Hindiston delegatsiyasining tashrifi davomida yana beshta istiqbolli tashabbusni ishga tushirish rejalashtirilgan. Ularning aksariyati farmatsevtika sohasi, xususan, O‘zbekistonda dori vositalarini ishlab chiqarish va mahalliylashtirish bilan bog‘liq.
Yangi loyihalarni nafaqat Toshkentda, balki mamlakat hududlarida ham amalga oshirish rejalashtirilmoqda. Jumladan, tashrif vaqtida tomonlar Andijon va Surxondaryo viloyatlaridagi ayrim tashabbuslar bo‘yicha muzokaralar olib borgan.
Hamkorlikning alohida yo‘nalishi tibbiy infratuzilmani rivojlantirish bilan bog‘liq. Eldor Adilov taʼkidlaganidek, Hindistonning yirik klinikalari, jumladan Apollo, O‘zbekistonda ham shunday tibbiy muassasalar ochish istagini bildirgan.
«Hindistonda Apollo va boshqa yirik klinikalar mavjud. Ular ham O‘zbekistonda shunday klinikalar ochish istagini bildirishdi. Hozir biz ushbu yo‘nalishda ham hamkorlik ustida ishlayapmiz», — dedi Sog‘liqni saqlash vaziri.
Tibbiyot sohasida vazir Hindiston bilan hamkorlikning asosiy yo‘nalishlari sifatida onkologiya va kardiologiyani qayd etdi. Farmatsevtika sektorida onkologik dori vositalarini ishlab chiqarish va mahalliylashtirish bilan shug‘ullanadigan Ankavel korxonasini ishga tushirish rejalashtirilgan.
Eldor Adilov yana bir istiqbolli yo‘nalish sifatida proton terapiyasini — onkologik kasalliklarni davolashning zamonaviy usulini tilga oldi. Uning so‘zlariga ko‘ra, ushbu texnologiya Hindistonda allaqachon qo‘llanilmoqda va O‘zbekiston rejalarida ham nazarda tutilgan. Biroq uni amalga oshirish joriy loyiha doirasiga kirmaydi.
Davlat tashrifi doirasida Ayurveda va anʼanaviy tibbiyotning boshqa turlari sohasida hamkorlik qilish to‘g‘risida o‘zaro anglashuv memorandumi ham imzolandi.
