Toshkent, O’zbekiston (UzDaily.uz) — O‘zbekiston va Osiyo taraqqiyot banki (OTB) iqtisodiy o‘sishni qo‘llab-quvvatlash, infratuzilmani modernizatsiya qilish va zamonaviy texnologiyalarni joriy etish borasidagi hamkorlikni kengaytirish masalalarini muhokama qildi.
Muzokaralar 2026 yil 15 oktyabr kuni Bangkokda Xalqaro valyuta jamg‘armasi va Jahon bankining yillik yig‘ilishlari doirasida O‘zbekiston Bosh vaziri o‘rinbosari — iqtisodiyot va moliya vaziri Jamshid Qo‘chqorov hamda OTB prezidenti Masato Kanda o‘rtasida bo‘lib o‘tdi. Bu haqda O‘zbekiston Iqtisodiyot va moliya vazirligining Axborot xizmati va kommunikatsiyalar boshqarmasi xabar berdi.
Uchrashuvda OTB prezidentining bosh maslahatchisi Keyitiro Inui, O‘zbekiston Markaziy banki raisining o‘rinbosari Nodirbek Ochilov, iqtisodiyot va moliya vazirining maslahatchisi Jasur Qarshiboyev hamda boshqa vakillar ham ishtirok etdi.
Muzokaralarning asosiy mavzularidan biri iqtisodiy tahlil va prognozlashda sunʼiy intellektdan foydalanish bo‘ldi.
Tomonlar maʼlumotlarni boshqarish tizimlarini takomillashtirish, raqamli infratuzilmani rivojlantirish va kiberxavfsizlik darajasini oshirish imkoniyatlarini ko‘rib chiqdilar. Shuningdek, ushbu yo‘nalishlarda OTBning texnik ko‘magidan foydalanish va xalqaro ekspertlarni jalb etish masalalari muhokama qilindi.
Ishtirokchilar elektr energiyasini taqsimlash tizimlarini modernizatsiya qilish masalasiga ham eʼtibor qaratdilar.
Uchrashuv doirasida tegishli loyiha bo‘yicha kelishuv imzolandi. Loyiha podstansiyalarni yangilash, elektr tarmoqlarining o‘tkazuvchanlik qobiliyatini oshirish, raqamli boshqaruv tizimlarini joriy etish va elektr taʼminoti ishonchliligini kuchaytirishni nazarda tutadi.
Muzokaralar yakunlari bo‘yicha tomonlar hamkorlikni mustahkamlash va belgilangan maqsadlarga erishish yo‘lida tizimli ish olib borishga kelishib oldilar.
