Toshkent, O’zbekiston (UzDaily.uz) — O‘zbekiston va Islom taraqqiyot banki (ITB) qishloq xo‘jaligini modernizatsiya qilish, infratuzilmani rivojlantirish va biznesning moliyalashtirish imkoniyatlarini kengaytirish masalalarini muhokama qildi.
O‘zbekiston Bosh vaziri o‘rinbosari — iqtisodiyot va moliya vaziri Jamshid Qo‘chqorovning ITB prezidenti Muhammad Al-Jasser bilan uchrashuvi 2026 yil 15 oktyabr kuni Bangkokda Xalqaro valyuta jamg‘armasi va Jahon bankining yillik yig‘ilishlari doirasida bo‘lib o‘tdi. Bu haqda O‘zbekiston Iqtisodiyot va moliya vazirligining Axborot xizmati va kommunikatsiyalar boshqarmasi xabar berdi.
Uchrashuvda, shuningdek, ITBning operatsion faoliyat bo‘yicha vitse-prezidenti Rami Ahmad, O‘zbekiston Markaziy banki raisining o‘rinbosari Nodirbek Ochilov, iqtisodiyot va moliya vazirining maslahatchisi Jasur Qarshiboyev hamda boshqa vakillar ishtirok etdi.
Tomonlar O‘zbekistondagi iqtisodiy islohotlarning ustuvor yo‘nalishlari va istiqbolli loyihalar bo‘yicha hamkorlikni kengaytirish imkoniyatlarini ko‘rib chiqdi. Asosiy mavzulardan biri agrar sektorni modernizatsiya qilish, jumladan, qishloq xo‘jaligi ishlab chiqaruvchilarini zamonaviy texnika va uskunalar bilan taʼminlash bo‘ldi.
Uchrashuv doirasida tomonlar ITB bilan qishloq xo‘jaligini mexanizatsiyalashni rivojlantirish loyihasini amalga oshirish to‘g‘risidagi bitimni imzoladi.
Loyiha iqlim o‘zgarishi sharoitlariga moslashtirilgan zamonaviy texnikalardan foydalanishni kengaytirish, mehnat unumdorligini oshirish, resurslardan oqilona foydalanish va agrar sektorda qiymat yaratish zanjirlarini rivojlantirishni nazarda tutadi.
Bundan tashqari, muzokara ishtirokchilari irrigatsiya tizimlari, avtomobil yo‘llari va qishloq infratuzilmasini rivojlantirish, shuningdek, qishloq xo‘jaligini moliyalashtirish va ipoteka bozorini qo‘llab-quvvatlash masalalarini muhokama qildi.
Kichik va o‘rta biznesni rivojlantirish hamda islom moliyalashtirish instrumentlaridan foydalanishni kengaytirishga alohida eʼtibor qaratildi.
Xususan, tomonlar moliya sektorida murabaxa va ijara moliyaviy instrumentlaridan foydalanish imkoniyatlarini ko‘rib chiqdi.
Uchrashuv yakunida tomonlar hamkorlikni mustahkamlash va muhokama qilingan yo‘nalishlar bo‘yicha ishlarni davom ettirishga kelishib oldi.
Vazirlik xabarida qishloq xo‘jaligini mexanizatsiyalash loyihasi bo‘yicha bitim summasi va uni amalga oshirish muddatlari ko‘rsatilmagan.
