Gault&Millau O‘zbekiston restoran va mehmonxonalarini baholashi mumkin

Toshkent, O’zbekiston (UzDaily.uz) — O‘zbekiston Turizm qo‘mitasi raisi Abdulaziz Akkulov 27 avgust kuni Gault&Millau Group vitse-prezidenti va hammuassisi Vladislav Skvorsov bilan gastronomik turizm sohasida hamkorlik qilish hamda mehmondo‘stlik sanoatini rivojlantirish istiqbollarini muhokama qildi. Tomonlar, shuningdek, O‘zbekiston milliy gastronomiyasini xalqaro professional muhitda targ‘ib qilish imkoniyatlarini ko‘rib chiqdi. Bu haqda O‘zbekiston Respublikasi Turizm qo‘mitasi xabar berdi.

Asosiy takliflardan biri Gault&Millau ekspertlari tomonidan O‘zbekistondagi restoran va mehmonxonalarni mustaqil baholashni tashkil etish bo‘ldi. Muhokama qilingan konsepsiyaga ko‘ra, xalqaro gid mutaxassislari inspeksiyalarni anonim tarzda o‘tkazadi. Shundan so‘ng natijalar va tavsiyalar xalqaro hamda milliy axborot resurslarida eʼlon qilinishi mumkin.

Gault&Millau — 1969 yilda jurnalistlar Anri Go va Kristian Miyo tomonidan asos solingan fransuz gastronomik gididir. Nashr Guide Jaune («Sariq gid»)ni chop etadi va Michelin bilan bir qatorda mashhur xalqaro restoran gidlaridan biri hisoblanadi.

Hozirda brend 21 ta mamlakatda faoliyat yuritadi. Turizm qo‘mitasi maʼlumotlariga ko‘ra, uning bazasiga qariyb 16 mingta restoran kiritilgan, tarmoqda 400 ga yaqin inspektor ishlaydi, auditoriyasi esa taxminan 20 million obunachini tashkil etadi.

Tomonlar, shuningdek, O‘zbekiston milliy gastronomik gidini tayyorlash masalasini muhokama qildi. Nashr 200–250 sahifadan iborat bo‘lishi, o‘zbek va ingliz tillarida chop etilishi hamda 2500 nusxada nashr qilinishi rejalashtirilmoqda.

Hamkorlikning yana bir ehtimoliy yo‘nalishi Gault&Millau xalqaro platformasida O‘zbekistonga bag‘ishlangan maxsus raqamli bo‘lim yaratish bo‘lishi mumkin. Unda milliy restoranlar, mehmonxonalar va gastronomik mahsulotlarni xalqaro auditoriyaga taqdim etish rejalashtirilmoqda.

Tomonlarning fikriga ko‘ra, ushbu tashabbuslarni amalga oshirish O‘zbekiston restoran va mehmonxona sanoatiga mustaqil xalqaro baho olish, shuningdek, mamlakatni gastronomik yo‘nalish sifatida tanitish imkonini beradi.

Bundan tashqari, hamkorlik o‘zbek gastronomik industriyasining Gault&Millau xalqaro raqamli platformasidagi ishtirokini kengaytirishga, xorijiy sayyohlar, professional hamjamiyat va ommaviy axborot vositalari vakillarining eʼtiborini jalb etishga xizmat qilishi mumkin.

Uchrashuv yakunlari bo‘yicha tomonlar uzoq muddatli hamkorlikdan manfaatdor ekanini bildirib, qo‘shma tadbirlar va loyihalarni kelishishni davom ettirishga kelishib oldi.