Toshkent, O’zbekiston (UzDaily.uz) — O‘zbekiston 14–16 oktyabr kunlari Italiyaning Rimini shahrida bo‘lib o‘tayotgan TTG Travel Experience 2026 xalqaro turistik ko‘rgazmasida ishtirok etmoqda. Mamlakatning milliy stendi O‘zbekiston Respublikasi Turizm qo‘mitasi tomonidan tashkil etilgan.
Ko‘rgazmaning birinchi kunida milliy stendning ochilish marosimi bo‘lib o‘tdi. Unda ishtirok etish O‘zbekistonning turistik imkoniyatlarini xorijda targ‘ib qilish, mamlakatning sayohat uchun jozibador yo‘nalish sifatidagi imijini mustahkamlash va xorijiy hamkorlar bilan hamkorlikni kengaytirishga qaratilgan.
Milliy stendda O‘zbekistonning 16 ta turoperatori, shuningdek, Uzbekistan Airways aviakompaniyasi vakillari ishtirok etmoqda.
Ko‘rgazmaning birinchi kunida ular xorijiy turoperatorlar, turistik kompaniyalar va sohaga aloqador boshqa ishtirokchilar bilan B2B formatida 400 ga yaqin uchrashuv o‘tkazdi.
Muzokaralar yangi ishbilarmonlik aloqalarini o‘rnatish, hamkorlik munosabatlarini shakllantirish va O‘zbekistonga tashrif buyuruvchi xorijiy sayyohlar sonini oshirishga qaratilgan kelishuvlarni tayyorlashga xizmat qiladi.
Ekspozitsiyadan mamlakatning turistik imkoniyatlari haqidagi reklama va axborot materiallari, videoroliklar hamda milliy hunarmandchilik buyumlari ham o‘rin olgan.
Ko‘rgazma tashrif buyuruvchilari O‘zbekistonning tarixiy-madaniy merosi, anʼanalari va madaniy qadriyatlari bilan tanishish, shuningdek, turizmning turli yo‘nalishlarini rivojlantirish imkoniyatlari haqida maʼlumot olishlari mumkin.
TTG Travel Experience 2026 ko‘rgazmasida ishtirok etish O‘zbekistonning xalqaro turistik bozordagi mavqeini mustahkamlash, Italiya va boshqa mamlakatlar bilan hamkorlikni kengaytirish imkoniyati sifatida baholanmoqda. Ko‘rgazma 16 oktyabrga qadar davom etadi.
