Diyora Imomxo‘jayev PFL bosh direktori etib qayta tasdiqlandi

Toshkent, O’zbekiston (UzDaily.uz) — O‘zbekiston Professional futbol ligasi (PFL) Ijroiya qo‘mitasi 19 avgust kuni Diyora Imomxo‘jayevni tashkilot bosh direktori lavozimiga yangi to‘rt yillik muddatga bir ovozdan tasdiqladi. Yig‘ilishda qo‘mitaning barcha sakkiz aʼzosi ishtirok etdi. Bu haqda O‘zbekiston Professional futbol ligasi xabar berdi.

Imomxo‘jayev nomzodini taqdim etish to‘g‘risidagi hujjat 17 avgust kuni Ijroiya qo‘mitasiga yuborilgan. Hujjatni Assotsiatsiya prezidenti Baxodir Qurbonov imzolagan.

19 avgust kuni bo‘lib o‘tgan yig‘ilishda tayinlov masalasi Ijroiya qo‘mitasining barcha sakkiz aʼzosi tomonidan ko‘rib chiqildi. Odil Ahmedov va Alisher Yusupov Kuala-Lumpurdan, Elbek Samatov esa Andijondan ovoz berishda masofadan turib ishtirok etdi.

Ovoz berish yakunlariga ko‘ra, Ijroiya qo‘mitasining barcha aʼzolari Imomxo‘jayev nomzodini qo‘llab-quvvatladi.

Shunday qilib, PFLning amaldagi bosh direktori 2026 yil 19 avgustdan boshlab yana to‘rt yil davomida o‘z vazifasini bajarishda davom etadi.