Toshkent, O’zbekiston (UzDaily.uz) — O‘zbekiston yengil atletika terma jamoasi vakili Anvar Anvarov Budapesht shahrida o‘tayotgan Hungarian Athletics Grand Prix xalqaro turnirida kumush medal sohibi bo‘ldi. Bu haqda O‘zbekiston Milliy olimpiya qo‘mitasi matbuot xizmati xabar qildi.
Uzunlikka sakrash bahslarida o‘zbekistonlik sportchi 8,12 metr natija qayd etdi. Anvarov ushbu ko‘rsatkichga ikkinchi urinishda erishdi va bu natija unga musobaqada ikkinchi o‘rinni egallash imkonini berdi.
Musobaqa g‘olibi Grekiya vakili Miltiadis Tentoglu bo‘ldi. U 8,31 metr natija qayd etdi. Bronza medalni esa Germaniya sportchisi Saymon Bats qo‘lga kiritdi. U ham 8,12 metr natija ko‘rsatdi.
