Toshkent, O’zbekiston (UzDaily.uz) — 19 oktyabr kuni yana 130 nafar O‘zbekiston fuqarosi Employment Permit System (EPS) dasturi doirasida ishlab chiqarish sohasida vaqtincha ishlash uchun Janubiy Koreyaga jo‘nab ketdi. Bu haqda O‘zbekiston Migratsiya agentligi xabar berdi.
Agentlik Janubiy Koreya tomoni bilan birgalikda O‘zbekiston fuqarolarining xorijda qonuniy va xavfsiz ishga joylashish imkoniyatlarini kengaytirish ustida ish olib bormoqda.
Ustuvor yo‘nalishlar qatorida ish beruvchilar bilan hamkorlikni mustahkamlash va O‘zbekiston fuqarolari uchun ish o‘rinlari sonini ko‘paytirish belgilangan.
Agentlik taʼkidlashicha, rasmiy shartnomalar asosida ishga joylashish fuqarolarga barqaror daromad olish va xalqaro kasbiy tajriba orttirish imkonini beradi.
