Toshkent, O’zbekiston (UzDaily.uz) — Toshkent viloyati hokimi Zoyir Mirzayev boshchiligidagi delegatsiya Xitoyga amaliy tashrif doirasida Sinoma International Engineering Co., Ltd. kompaniyasi bilan sanoat injiniringi va qurilish materiallari ishlab chiqarish sohalarida hamkorlik istiqbollarini muhokama qildi.
Uchrashuv tashrifning birinchi kuni Pekin shahrida bo‘lib o‘tdi. Bu haqda Toshkent viloyati hokimligi matbuot xizmati xabar berdi.
Asosiy eʼtibor hududda zamonaviy ishlab chiqarish quvvatlarini yaratish, qurilish materiallari sanoatini rivojlantirish, korxonalarni texnologik modernizatsiya qilish va ilg‘or muhandislik yechimlarini joriy etishga qaratildi.
Sinoma International Engineering kompaniyasi sement va tog‘-kon sanoati uchun EPC tamoyili asosida kompleks loyihalarni amalga oshiradi hamda ishlab chiqarish liniyalari uchun aylanma pechlar va maydalagichlarni o‘z ichiga olgan yuqori texnologik uskunalar ishlab chiqaradi.
Kompaniya, shuningdek, qayta tiklanuvchi energetika, atrof-muhitni muhofaza qilish, raqamli texnologiyalar va sunʼiy intellekt asosidagi boshqaruv tizimlari sohalarida loyihalarni rivojlantirmoqda. Uchrashuvda taqdim etilgan maʼlumotlarga ko‘ra, Sinoma International 70 dan ortiq mamlakatda 1000 dan ziyod loyihani amalga oshirgan.
2025 yilda kompaniyaning tushumi 73,27 milliard AQSH dollarini, sof foydasi 4,23 milliard AQSH dollarini, jami aktivlari esa 91,65 milliard AQSH dollarini tashkil etgan.
Muzokaralardan so‘ng Toshkent viloyati delegatsiyasi kompaniya faoliyati, uning muhandislik ishlanmalari, ishlab chiqarish texnologiyalari, yuqori texnologik uskunalari va sanoat loyihalarini amalga oshirish tajribasi bilan tanishdi.
Uchrashuv yakunlari bo‘yicha tomonlar Toshkent viloyatining sanoat salohiyati va investitsiya imkoniyatlarini inobatga olgan holda istiqbolli loyihalarni birgalikda o‘rganishga kelishib oldi.
Potensial hamkorlik yo‘nalishlari qatorida qurilish materiallari ishlab chiqarish, sanoat injiniringi, zamonaviy texnologiyalarni joriy etish va yangi ishlab chiqarish quvvatlarini yaratish belgilandi. Tomonlar istiqbolli tashabbuslarni amaliy amalga oshirish bosqichiga o‘tkazish niyatida.
