Tennis festivali TXIF ishtirokchilarini birlashtirdi

Toshkent, O’zbekiston (UzDaily.uz) — Toshkent Olimpiya shaharchasida Toshkent xalqaro investitsiya forumi (TXIF) sport dasturi doirasida «Avlodlar birligi» (Generations United) tennis festivali bo‘lib o‘tdi. Tadbir O‘zbekiston tennis federatsiyasi va mamlakatda qayta tiklanuvchi energetika sohasidagi eng yirik investorlardan biri bo‘lgan ACWA Power kompaniyasi tomonidan tashkil etildi.

Tashabbus avlodlar o‘rtasidagi o‘zaro hamkorlikni mustahkamlash, ustozlik madaniyatini rivojlantirish va sport orqali ijtimoiy yakkalanishni yengib o‘tishga qaratilgan. Loyiha sport tadbirlari jamoat birdamligini shakllantirish, tajriba almashish va insonlar o‘rtasidagi aloqalarni mustahkamlash uchun samarali maydon bo‘lib xizmat qilishi mumkinligini namoyon etmoqda.

Festival O‘zbekiston Respublikasi Investitsiyalar, sanoat va savdo vazirligi, Sport vazirligi hamda O‘zbekiston Milliy olimpiya qo‘mitasi ko‘magida TXIF doirasida tashkil etilgan maxsus tennis turnirining bir qismi bo‘ldi. Musobaqalarda O‘zbekiston vakillari, forumning xalqaro delegatlari, yoshlar hamda katta avlod vakillari ishtirok etdi.

2025 yilda yo‘lga qo‘yilgan «Avlodlar birligi» loyihasi turli yosh guruhlari o‘rtasida muloqot yetishmasligi va yolg‘izlik bilan bog‘liq dolzarb ijtimoiy masalalarni hal etishga qaratilgan.

Sport va taʼlim tadbirlarida birgalikda ishtirok etish orqali tashabbus muloqotni rivojlantirish, o‘zaro ishonchni mustahkamlash va avlodlar o‘rtasida bilim almashinuvini rag‘batlantiradi.

Festival doirasida tennis bo‘yicha mahorat darslari hamda ishtirokchilar tay-breyklarning jadal formatida bellashgan Generations United Tiebreak Slam turniri tashkil etildi. Bu yondashuv norasmiy muloqot, jamoaviy hamkorlik va ijtimoiy aloqalarni mustahkamlash uchun sharoit yaratdi.

ACWA Power kompaniyasining O‘zbekistondagi rahbari Jon Zaidining taʼkidlashicha, barqaror rivojlanish avlodlar o‘rtasidagi hamkorliksiz amalga oshmaydi.

«Katta avlodning tajribasi va bilimlari yoshlarning energiyasi hamda innovatsion fikrlashi bilan uyg‘unlashganda jamiyatning barqaror rivojlanishi uchun asos yaratiladi. “Avlodlar birligi” loyihasi ushbu sifatlar samarali tarzda bir-birini to‘ldirishi mumkin bo‘lgan maydonni taqdim etadi», — dedi u.

O‘zbekiston tennis federatsiyasi raisi o‘rinbosari Aziz Xamidovning so‘zlariga ko‘ra, bugun tennisni rivojlantirish sport yutuqlari doirasidan ancha keng ahamiyat kasb etmoqda.

«Sport inson kapitalini shakllantirish, ijtimoiy aloqalarni mustahkamlash va sog‘lom turmush tarzini targ‘ib qilishning muhim vositasiga aylanmoqda. Toshkent xalqaro investitsiya forumi doirasida festivalning o‘tkazilishi loyihaga qo‘shimcha ahamiyat bag‘ishlab, biznes, xalqaro tashkilotlar va jamoat institutlari vakillarini birlashtirmoqda», — dedi u.

Tashkilotchilar taʼkidlashicha, mazkur loyiha ACWA Power kompaniyasining mahalliy hamjamiyatlarni qo‘llab-quvvatlash va uzoq muddatli ijtimoiy taʼsir yaratishga qaratilgan korporativ ijtimoiy masʼuliyat dasturining bir qismi hisoblanadi. Kompaniya inson kapitaliga investitsiya kiritishni yirik infratuzilma va energetika loyihalari bilan bir qatorda barqaror rivojlanishning muhim elementi sifatida ko‘radi.

Festivalning TXIF maydonida o‘tkazilishi xalqaro investitsiya forumlari nafaqat iqtisodiy masalalarni muhokama qilish maydoni, balki hayot sifati oshishi va jamiyat birligini mustahkamlashga qaratilgan ijtimoiy tashabbuslarni ilgari surish platformasi ham bo‘lishi mumkinligini namoyon etdi.

Kelgusida O‘zbekiston tennis federatsiyasi va ACWA Power «Avlodlar birligi» loyihasini kengaytirish, sportni ommalashtirish, ustozlikni rivojlantirish va turli yosh guruhlarini faol jamoat hayotiga jalb qilish bo‘yicha yangi dasturlarni amalga oshirishni rejalashtirmoqda.

Tashkilotchilar fikricha, bunday tashabbuslar yana-da inklyuziv jamiyat shakllanishiga xizmat qiladi va O‘zbekistonda avlodlar o‘rtasidagi hamkorlikni mustahkamlash uchun qo‘shimcha imkoniyatlar yaratadi.