O‘zbekistonda yetti oyda 156 nafar ishchi halok bo‘ldi

Toshkent, O’zbekiston (UzDaily.uz) — O‘zbekistonda 2026 yilning yanvar-iyul oylarida mehnat faoliyati bilan bog‘liq 529 ta baxtsiz hodisa qayd etildi. Ularning oqibatida 156 nafar kishi halok bo‘ldi. Bu haqda Davlat mehnat inspeksiyasi matbuot xizmati xabar berdi.

Hodisalarning umumiy sonidan 24 tasi guruhli baxtsiz hodisalar bo‘lgan, 372 tasi og‘ir oqibatlarga olib kelgan, 132 tasi esa o‘lim bilan yakunlangan.

Jami ish joylarida 580 nafar kishi jabrlangan. 402 nafar xodim og‘ir jarohat olgan, 22 nafari yengil jarohatlangan, yana 156 nafar ishchi halok bo‘lgan.

Baxtsiz hodisalarning eng ko‘p soni sanoat sohasida — 168 ta va qurilish sohasida — 158 ta qayd etilgan.

Hududlar orasida Toshkent shahri yetakchilik qilmoqda. U yerda 95 ta baxtsiz hodisa qayd etilgan. Toshkent viloyatida 58 ta, Qashqadaryo viloyatida esa 38 ta shunday hodisa sodir bo‘lgan.

Jabrlangan xodimlar va halok bo‘lganlarning oila aʼzolari foydasiga bir martalik hamda har oylik to‘lovlar ko‘rinishida jami 11,379 milliard so‘m undirildi.