Toshkentda tibbiy chiqindilar bilan bog‘liq qoidabuzarliklar aniqlandi
Toshkent, O’zbekiston (UzDaily.uz) — Toshkentda tibbiy chiqindilar bilan muomala qilish qoidalari buzilgan holatlar aniqlandi. Jumladan, xavfli chiqindilar maishiy chiqindilar bilan aralashtirilgani, poligonlarga olib chiqilgani yoki buning uchun belgilanmagan joylarga tashlangani maʼlum bo‘ldi. Bu haqda Ekologik vaziyatni yaxshilash bo‘yicha kechiktirib bo‘lmaydigan chora-tadbirlarni amalga oshirish maxsus komissiyasi xabar berdi.
Tekshiruvlar natijasida qator tibbiyot muassasalarida xavfli chiqindilar maishiy chiqindilardan ajratilmagani aniqlandi. Natijada ular poligonlarga olib chiqilgan yoki buning uchun mo‘ljallanmagan joylarga tashlangan.
Jahon sog‘liqni saqlash tashkiloti maʼlumotlariga ko‘ra, tibbiy chiqindilarning 15 foizi xavfli hisoblanadi. Ular bilan noto‘g‘ri muomala qilish kasalliklarning tarqalishi, zaharlanish va atrof-muhitning ifloslanishiga olib kelishi mumkin.
O‘zbekiston Prezidentining 2024 yil 17 iyuldagi PQ-263-son qarori ijrosi doirasida AQSHning SAYAR LLC kompaniyasi Sayar green xorijiy korxonasini taʼsis etdi. Kompaniya umumiy qiymati 115 million AQSH dollariga teng investitsiya loyihasini amalga oshirmoqda. Biroq tibbiyot muassasalari xavfli chiqindilarni investorga topshirmayotgani sababli yaratilgan mexanizm to‘liq hajmda ishlamayapti.
Toshkentda tibbiy chiqindilarni qayta ishlash uchun umumiy sutkalik quvvati 12 tonnani tashkil etuvchi ikkita qurilma o‘rnatilgan. Biroq amalda ularga sutkasiga qariyb 3 tonna chiqindi kelib tushmoqda. Shu sababli uskunalar quvvatining atigi 25 foizidan foydalanilmoqda.
2026 yilning olti oyi davomida poytaxtda 3 239,05 kub metr tibbiy chiqindi olib chiqilgan.
Ko‘rsatilgan tibbiyot muassasalari orasida eng ko‘p chiqindi 16-sonli klinik shifoxonada — 1 795,40 kub metr, 3-sonli klinik yuqumli kasalliklar shifoxonasida — 445,44 kub metr va Virusologiya ilmiy-tadqiqot instituti klinikasida — 382 kub metr hosil bo‘lgan.
Bundan tashqari, Respublika ftiziatriya va tayanch-harakat tizimi kasalliklarini reabilitatsiya qilish bolalar markazi, Dermatovenerologiya va kosmetologiya markazining Toshkent shahar filiali, 1-sonli shahar klinik yuqumli kasalliklar shifoxonasi, Ftiziatriya va pulmonologiya ilmiy-amaliy tibbiyot markazi hamda teri-tanosil kasalliklari shifoxonasida xizmat ko‘rsatishning belgilangan tartibi buzilgani aniqlandi.
Aniqlangan holatlar bo‘yicha masʼul shaxslarga nisbatan tegishli choralar ko‘rilmoqda. Maxsus komissiya va huquqni muhofaza qiluvchi organlar tomonidan O‘zbekistonning boshqa hududlarida ham shunga o‘xshash tekshiruvlar o‘tkazilmoqda.
