Sud O‘zbekistonda Samsyng brendi ostidagi qalbaki texnika savdosini taqiqladi

Toshkent, O‘zbekiston (UzDaily.uz) — O‘zbekistonga Samsung brendiga taqlid qilingan Samsyng nomi ostidagi qalbaki texnika olib kirishga urinish aniqlandi. Bu haqda Adliya vazirligi matbuot xizmati xabar qildi.

Idora maʼlumotlariga ko‘ra, kompaniyalardan biri O‘zbekistonga Samsyng brendi bilan elektron mahsulotlar olib kirishga uringan. Mazkur belgi Samsung tovar belgisi bilan adashtirish darajasida o‘xshash deb baholangan.

Tovar belgisi huquq egasi sudga murojaat qilgan va 2026 yil 4 iyun kuni sud kompaniya harakatlarini intellektual mulk huquqlarini buzish deb topgan.

Sud mazkur markirovka ostida import qilingan mahsulotlarni sotishni taqiqladi hamda javobgar tomon zimmasiga sud xarajatlarini qoplash majburiyatini yukladi.

Adliya vazirligi tadbirkorlarga o‘z brendlarini o‘z vaqtida ro‘yxatdan o‘tkazish zarurligini eslatib, tovar belgilari noqonuniy qo‘llanilishi holatlari haqida xabar berishga chaqirdi.