Sud 53 tonna qalbaki elektrodni yo‘q qilishga qaror qildi

Toshkent, O’zbekiston (UzDaily.uz) — Toshkent tumanlararo iqtisodiy sudi tovar belgisiga bo‘lgan huquqning buzilishiga oid ish bo‘yicha huquq egasining daʼvosini qanoatlantirib, O‘zbekiston hududiga olib kirilgan 53 tonna qalbaki payvandlash elektrodlarini yo‘q qilish to‘g‘risida qaror chiqardi. Bu haqda Adliya vazirligi xabar qildi.

Sud muhokamasi davomida javobgar ARSENAL tovar belgisiga adashtirish darajasida o‘xshash belgi qo‘yilgan mahsulotni import qilgani aniqlandi. Sud bahosiga ko‘ra, bunday markirovka isteʼmolchilarni chalg‘itishi mumkin bo‘lgan hamda huquq egasining mutlaq huquqlarini buzgan.

Sud bojxona omborida saqlanayotgan 53 tonna qalbaki mahsulotni musodara qilish va yo‘q qilish to‘g‘risida qaror qabul qildi.

Mahsulotni yo‘q qilish bilan bog‘liq barcha xarajatlar javobgar zimmasiga yuklatildi.

Shuningdek, sud javobgardan daʼvogar foydasiga sud xarajatlarini, jumladan 8 240 000 so‘m miqdoridagi davlat boji hamda 41 200 so‘m miqdoridagi pochta xarajatlarini undirish to‘g‘risida qaror chiqardi. Undiriladigan umumiy summa 8 281 200 so‘mni tashkil etdi.