UzNIF sof aktivlar qiymati sezilarli oshishini kutmoqda

Toshkent, O’zbekiston (UzDaily.uz) — «O‘zbekiston Respublikasi Milliy investitsiya jamg‘armasi» AJ (UzNIF) 2026 yil 30 iyun holatiga ko‘ra sof aktivlar qiymati (SAQ) 31 may holati bo‘yicha eʼlon qilingan ko‘rsatkichga nisbatan sezilarli darajada oshishini kutayotganini maʼlum qildi.

Kompaniya xabarida qayd etilishicha, UzNIF investitsiya portfeli aktivlarining yarim yillik mustaqil baholash jarayoni deyarli yakunlangan. Hisobot yakuniy tarzda tasdiqlangan taqdirda, iyun oyi uchun SAQ ko‘rsatkichi avvalgi natijadan ancha yuqori bo‘lishi kutilmoqda.

O‘sishning asosiy omili jamg‘armaning investitsiya portfeliga kiruvchi ayrim listingga chiqarilmagan aktivlar hamda likvidligi past bo‘lgan listingdagi aktivlarning haqqoniy qiymati yangilanishi bilan bog‘liq. Yangi baholashlar mustaqil baholovchi ishtirokida amalga oshirilgan.

Kompaniyada taʼkidlanishicha, aktivlarni baholashda qo‘llaniladigan metodologiyalar o‘zgarmagan. Qayta baholashning standart tartibi doirasida faqat dastlabki maʼlumotlar va qabul qilingan taxminlarga tuzatishlar kiritilgan.

2026 yil 30 iyun holatiga ko‘ra sof aktivlar qiymati to‘g‘risidagi to‘liq hisobotni 21 iyul kuni eʼlon qilish rejalashtirilgan. SAQ o‘zgarishiga taʼsir etgan asosiy omillar haqidagi qo‘shimcha maʼlumotlar iyun oyi hisobotida, shuningdek, kompaniyaning investorlar bilan bo‘lib o‘tadigan yarim yillik muloqoti davomida taqdim etiladi.

Kompaniya shuningdek, mazkur xabar Buyuk Britaniyaning Bozorda suiisteʼmol qilish to‘g‘risidagi nizomi (UK Market Abuse Regulation)ning 7-moddasiga muvofiq insayderlik axborotini o‘z ichiga olishini maʼlum qildi. Xabar eʼlon qilinganidan so‘ng ushbu maʼlumot jamoatchilik uchun oshkor qilingan deb hisoblanadi.