Sergelida 2027 yilda 5,5 kmlik BRT yo‘li qurilishi rejalashtirilgan

Toshkent, O’zbekiston (UzDaily.uz) — Toshkent shahrining Sergeli tumanida 2027 yilda uzunligi 5,5 kilometr bo‘lgan alohida avtobus qatnovi yo‘lagi — BRT tizimini qurishni boshlash rejalashtirilmoqda. Bu haqda O‘zbekiston Prezidenti Shavkat Mirziyoyev tumanning ijtimoiy-iqtisodiy rivojlanishiga bag‘ishlangan yig‘ilishda maʼlum qildi.

Rejaga ko‘ra, yangi yo‘nalish Yangi Sergeli ko‘chasi bo‘ylab o‘tadi va 2025 yil kuzida foydalanishga topshirilgan Shota Rustaveli ko‘chasidagi BRT koridori bilan integratsiya qilinadi.

Yig‘ilish davomida davlat rahbari Sergeli tumanining umumiy uzunligi 23 kilometr bo‘lgan asosiy magistral yo‘llarida harakat xavfsizligini oshirish choralarini ko‘rish bo‘yicha topshiriqlar berdi. Jumladan, 455 ta “aqlli” svetofor o‘rnatish, 150 ta avtobus bekatini modernizatsiya qilish va 10 mingta avtoturargoh o‘rni yaratish ko‘zda tutilgan.

Poytaxtning janubiy qismi transport infratuzilmasini rivojlantirish masalalariga ham alohida eʼtibor qaratildi. Prezident Toshkent halqa avtomobil yo‘lida qurilayotgan yangi yo‘l o‘tkazgich barpo etilishini jadallashtirish zarurligini taʼkidladi. U Sergeli, Bektemir va Yangihayot tumanlarini shaharning boshqa hududlari bilan yana-da qulay bog‘lashga xizmat qilishi lozim.

Shuningdek, yig‘ilishda xorijiy sayyohlar uchun shahar navigatsiyasini takomillashtirish choralari muhokama qilindi. Masʼul idoralarga tarixiy obidalar, bog‘lar, bozorlar, turistik mahallalar, kafe va restoranlar o‘rtasida qulay marshrutlarni tashkil etish vazifasi yuklatildi.

Bundan tashqari, aeroportlar, temir yo‘l vokzallari, avtobus bekatlari va metro stansiyalarida sayyohlar uchun shahar marshrutlari xaritalarini o‘rnatish, shuningdek, ularni navigatsiya imkoniyatlariga ega bepul mobil ilova bilan taʼminlash rejalashtirilmoqda.

Joriy yilning mart oyida Toshkent shahar Yo‘l harakatini tashkil etish markazi poytaxtda to‘rtta BRT yo‘nalishini barpo etish rejalari haqida maʼlum qilgan edi. Ular qatoriga Yangi Sergeli ko‘chasidagi marshrut ham kiritilgan. Yangi alohida avtobus yo‘laklarining umumiy uzunligi 16 kilometrdan ortiq bo‘lishi kutilmoqda.