Toshkentda odamlarni qutqarish vaqtida FVV xodimi halok bo‘ldi
Toshkent, O’zbekiston (UzDaily.uz) — 15 avgustga o‘tar kechasi Toshkent shahrining Uchtepa tumanida ko‘p qavatli uyda yong‘in sodir bo‘ldi. Qutqaruv operatsiyasi davomida O‘zbekiston Respublikasi Favqulodda vaziyatlar vazirligi Respublika maxsus qutqaruv batalyoni guruh komandiri, kapitan Boburmirzo Pardayev halok bo‘ldi.
Qutqaruvchilar yong‘in sodir bo‘lgan binodagi aholini evakuatsiya qildi. Bu haqda O‘zbekiston Respublikasi Favqulodda vaziyatlar vazirligi xabar berdi.
«Quyi Darxon» mahallasi hududida joylashgan uyda yong‘in sodir bo‘lgani haqidagi xabar Favqulodda vaziyatlar vazirligining navbatchilik qismiga soat 03:41 da kelib tushgan.
Hodisa joyiga Toshkent shahar Favqulodda vaziyatlar boshqarmasi va Respublika maxsus qutqaruv batalyoni xodimlari yetib borgan.
Yong‘inni o‘chirish vaqtida qutqaruvchilar bir vaqtning o‘zida uy aholisini evakuatsiya qilish ishlarini ham olib borgan. Odamlarni binodan olib chiqishga muvaffaq bo‘lingan.
Qutqaruv operatsiyasida kapitan Boburmirzo Pardayev ham ishtirok etgan. Odamlarni evakuatsiya qilish vaqtida u og‘ir jarohatlar olgan va halok bo‘lgan.
Favqulodda vaziyatlar vazirligi matbuot xizmati maʼlum qilishicha, kapitan Pardayev so‘nggi daqiqaga qadar o‘z xizmat burchini bajargan va odamlar xavfsizligini o‘z hayotidan ustun qo‘ygan.
Favqulodda vaziyatlar vazirligi rahbariyati va shaxsiy tarkibi halok bo‘lgan ofitserning oilasi va yaqinlariga taʼziya bildirdi.
