O‘zbekistonda bank ilovalarida ro‘yxatdan o‘tish qoidalari o‘zgardi
Toshkent, O’zbekiston (UzDaily.uz) — O‘zbekistonda fuqarolar banklarning mobil ilovalarida ro‘yxatdan o‘tish va ularga bank kartalarini yaqin qarindoshiga rasmiylashtirilgan telefon raqami orqali bog‘lash imkoniyatiga ega bo‘ladi. Axborot va kiberxavfsizlik talablariga kiritilgan tegishli o‘zgartishlar Adliya vazirligi tomonidan 2026 yil 14 avgustda ro‘yxatdan o‘tkazildi. Bu haqda O‘zbekiston Adliya vazirligi xabar berdi.
O‘zgartishlar kredit va to‘lov tashkilotlari hamda to‘lov tizimlari operatorlari tomonidan jismoniy shaxslarga moliyaviy xizmatlarni masofadan ko‘rsatishda axborot va kiberxavfsizlikni taʼminlash, shuningdek, firibgarlikning oldini olish bo‘yicha minimal talablar to‘g‘risidagi Nizomga kiritildi. Hujjat 3759-1-son bilan ro‘yxatdan o‘tkazilgan.
Yangi qoidalarga ko‘ra, ro‘yxatdan o‘tish uchun ota-ona, aka-uka, opa-singil, o‘g‘il, qiz yoki turmush o‘rtog‘i nomiga rasmiylashtirilgan telefon raqamidan foydalanish mumkin. Bu tartib turmush o‘rtoqning ota-onasi, aka-ukasi, opa-singillari va farzandlariga ham tatbiq etiladi. Yaqin qarindoshlik mavjudligi haqidagi maʼlumot tegishli tizimda avtomatik ravishda tasdiqlanadi.
Banklar, shuningdek, mobil ilovalar orqali amalga oshiriladigan va kod yordamida tasdiqlash talab etilmaydigan pul o‘tkazmalarining maksimal miqdorini belgilaydi.
Foydalanuvchilarni zararli dasturiy taʼminot va mobil qurilmalarga masofadan kirishdan himoya qilish bo‘yicha qo‘shimcha choralar ham belgilandi. Bunday holatlar aniqlanganda foydalanuvchiga nafaqat SMS-xabar, balki PUSH-bildirishnoma ham yuboriladi.
Mobil bank ilovasiga boshqa qurilmadan kirilganda, unga bog‘langan bank kartalari vaqtincha bloklanadi. Ularni qayta faollashtirish uchun operatsiyani kod yordamida tasdiqlash talab etiladi.
Bundan tashqari, mobil ilova orqali pul mablag‘larini o‘tkazishda foydalanuvchiga nafaqat jo‘natuvchining maʼlumotlari, balki mablag‘ni qabul qiluvchining ismi va familiyasi ham ko‘rsatiladi. Bunda qabul qiluvchining shaxsiy maʼlumotlarining bir qismi yashiriladi.
