Toshkent, O’zbekiston (UzDaily.uz) — Samarqandda AQSHning qalbaki dollarlarini sotishga uringanlikda gumon qilinayotgan uch nafar shaxs qo‘lga olindi. Ular O‘zbekiston Davlat xavfsizlik xizmati, bojxona organlari va ichki ishlar organlari xodimlari tomonidan o‘tkazilgan tezkor tadbir davomida aniqlandi.
Huquqni muhofaza qiluvchi organlar maʼlumotlariga ko‘ra, Toyloq tumanida yashovchi, 1996, 2002 va 2003 yillarda tug‘ilgan uch nafar shaxs shartli xaridorga umumiy qiymati 7 400 AQSH dollarini tashkil etuvchi, har biri 100 dollarlik qalbaki banknotlarni sotgan.
Ushbu bitim 44 million so‘mga baholangan. Gumonlanuvchilar pul va banknotlarni topshirayotgan vaqtda qo‘lga olingan.
Tekshiruv davomida qo‘lga olingan shaxslardan ikki nafari muqaddam sudlangani aniqlangan. Dastlabki maʼlumotlarga ko‘ra, qalbaki banknotlar Turkiyadan olib kirilgan.
Mazkur holat yuzasidan tergovga qadar tekshiruv harakatlari olib borilmoqda.
Huquqni muhofaza qiluvchi organlar noqonuniy faoliyatga aloqador bo‘lishi mumkin bo‘lgan boshqa shaxslarni aniqlash choralarini ham ko‘rmoqda.
