ROBOTIS kompaniyasi Toshkentda robototexnika loyihasini ishga tushiradi

Toshkent, O’zbekiston (UzDaily.uz) — Toshkentdagi "Yangi Avlod" maxsus sanoat zonasida gumanoid robotlar va ularning komponentlarini ishlab chiqarish loyihasining tantanali ochilish marosimi bo'lib o'tdi. Loyiha ROBOTIS tomonidan "O'zeltexsanoat" uyushmasi tashabbusi bilan amalga oshirilmoqda.

Mazkur loyiha doirasida qariyb $70 million dollar investitsiya jalb etilishi, 2 mingdan ortiq yangi ish o‘rni yaratilishi hamda 10 gektar maydonda zamonaviy ishlab chiqarish majmuasi barpo etilishi rejalashtirilgan.

Loyihaning ishga tushirilishi O'zbekistonda yuqori texnologiyali sanoat va robototexnika sohasini rivojlantirishda muhim qadam bo'lishi kutilmoqda.

Loyiha shuningdek, ishlab chiqarish imkoniyatlarini kengaytirish va zamonaviy texnologiyalar sohasida inson resurslarini rivojlantirishga qaratilgan.

O'zbekiston Bosh vaziri o'rinbosari Jamshid Xo'jayev loyiha robototexnikani rivojlantirish, sun'iy intellekt texnologiyalarini joriy etish va mahalliy muhandislik bazasini yaratish bilan bog'liq yangi sanoat sohasini shakllantirishda muhim qadam ekanligini ta'kidladi.

Loyihaning investitsiya hajmi 100 million AQSh dollarini tashkil etadi. Korxona 2000 dan ortiq ish o'rinlarini yaratishi va O'zbekistonda sun'iy intellekt bilan boshqariladigan gumanoid robotlarni ishlab chiqaradigan birinchi korxonalardan biriga aylanishi kutilmoqda.

ROBOTIS prezidenti Kim Byung-su va uning koreyalik hamkorlariga O'zbekistonga bo'lgan ishonchi va loyihani tezkor ishga tushirgani uchun alohida minnatdorchilik bildirildi. Ta'kidlanishicha, o'tgan yilning dekabr oyida Koreya Respublikasida bo'lib o'tgan muzokaralar davomida hamkorlik to'g'risidagi kelishuvga erishilgan, shundan so'ng kompaniya tashabbusni amaliy amalga oshirishga o'tgan.

Ta'kidlanishicha, Koreya Respublikasi investitsiyalar va yuqori texnologiyalar sohasida O'zbekistonning asosiy hamkorlaridan biri bo'lib qolmoqda. Hozirda mamlakatda Koreya kapitali ishtirokidagi taxminan 1000 ta korxona faoliyat yuritmoqda va umumiy investitsiya hajmi 8 milliard AQSh dollaridan oshdi.

ROBOTIS loyihasi ikki mamlakat o'rtasidagi texnologik hamkorlikni chuqurlashtirish va O'zbekistonda yuqori texnologiyali ishlab chiqarishni rivojlantirishning namunasi sifatida qaralmoqda.