Toshkent, O‘zbekiston (UzDaily.uz) — Qozog‘iston Bosh vazirining o‘rinbosari – tashqi ishlar vaziri Murat Nurtleu Qozog‘istondagi O‘zbekiston elchisi Baxtiyor Ibrohimov bilan uchrashuv o‘tkazdi.

Suhbat davomida Qozog‘iston va O‘zbekiston o‘rtasida siyosiy, savdo-iqtisodiy, suv-energetika hamda tranzit-transport sohalaridagi ikki tomonlama hamkorlikning muhim masalalari muhokama qilindi.

Aprel oyida Qozog‘iston Prezidenti Qasim-Jomart To‘qayevning Xivadagi ishchi tashrifi hamda o‘tgan yilning avgust oyida O‘zbekiston Prezidenti Shavkat Mirziyoyevning Ostonaga davlat tashrifi chog‘ida erishilgan kelishuvlarni amalga oshirishga alohida e’tibor qaratildi.

Murat Nurtleu Qozog‘istonning O‘zbekiston bilan do‘stlik, strategik sheriklik va ittifoqchilikka asoslangan ko‘p qirrali hamkorlikni yanada chuqurlashtirishga qiziqishini ta’kidladi.