Toshkent, O’zbekiston (UzDaily.uz) — Qoraqalpog‘istonda umumiy quvvati 1 GVt bo‘lgan data-markazlarni energiya bilan taʼminlash uchun yangi energetika infratuzilmasini yaratish rejalashtirilmoqda. Loyiha Nukus tumanida texnopark barpo etish va uni qayta tiklanuvchi energiya manbalari orqali elektr energiyasi bilan taʼminlashni nazarda tutadi. Bu haqda O‘zbekiston Energetika vazirligi xabar berdi.
O‘zbekiston prezidenti topshiriqlariga muvofiq, Nukus tumanida tarkibiga umumiy quvvati 1 GVt bo‘lgan data-markazlar kiradigan texnopark tashkil etiladi. Ularning faoliyati uchun “yashil” energiyadan foydalanish ko‘zda tutilgan.
Loyiha doirasida Qoraqalpog‘istonda istiqbolli shamol elektr stansiyalarini data-markazlar bilan bog‘lash imkonini beradigan yangi elektr infratuzilmasi barpo etiladi. Jumladan, 500/220 kV kuchlanishli yangi podstansiya va 220 kV kuchlanishli qo‘shimcha elektr uzatish liniyasi qurilishi rejalashtirilmoqda.
Yangi infratuzilma Nukusdagi data-markazlarni umumiy quvvati 3,3 GVt bo‘lgan mintaqadagi shamol elektr stansiyalariga ulash imkonini beradi. Bunda data-markazlarni energiya bilan taʼminlash aholi va iqtisodiyot tarmoqlarining amaldagi elektr isteʼmoliga taʼsir qilmagan holda tashkil etiladi.
Buning uchun data-markazlarni alohida hududda joylashtirish va ularni zarur energetika infratuzilmasi bilan kompleks taʼminlash rejalashtirilmoqda. Energetika vazirligi maʼlumotlariga ko‘ra, yirik obyektlarni bir joyga jamlash infratuzilma xarajatlarini optimallashtirish va elektr taʼminotini tashkil etish samaradorligini oshirish imkonini beradi.
Tashkil etiladigan data-markazlar nafaqat O‘zbekiston, balki butun mintaqa uchun raqamli xizmatlar va yuqori texnologik yechimlarni taqdim etishi kutilmoqda.
Yangi energetika infratuzilmasining birinchi bosqichini 2027 yilning ikkinchi yarmida foydalanishga topshirish rejalashtirilgan. Infratuzilmaning to‘liq quvvatga chiqishi 2028 yilning ikkinchi yarmiga mo‘ljallangan.
Loyihaning amalga oshirilishi yangi data-markazlarni energetika tizimiga integratsiya qilish, yuqori texnologiyali investitsiyalarni jalb etish va Qoraqalpog‘istonning energetik salohiyatidan yana-da samarali foydalanish uchun sharoit yaratishi kutilmoqda.
